Chantar fa bain a cor ed olma

La giuventetgna svizra s’inscuntra e chanta dals 14 fin 17 da matg 2015 a Mustér al SKJF, il festival svizzer per chors d’uffants e giuvenils.

Uffants dal Chor d'affons vischnaunca Sumvitg al SKJF 2013. Bild in Lightbox öffnen.

Legenda da maletgs: Uffants dal Chor d'affons vischnaunca Sumvitg al SKJF 2013. MAD

Cura che passa 1200 uffants e giuvenils s’inscuntran per chantar, lura derasa quai en mintga cas in’atmosfera da pasch e da plaschair da viver. Mez matg ha lieu a Mustér l’uschenumnà SKJF, il festival svizzer per chors d’uffants e da giuvenils. 34 chors da tut las quatter regiuns linguisticas da la Svizra vegnan per quatter dis a Mustér per chantar, per emprender da chantar e per preschentar lur chanzuns al public. E sa chapescha er per chantar da cuminanza.

A la tschertga da la «melodia absoluta»

RTR al 5avel festival da chors d'uffants e giuvenils a Mustér. Avrir maletg en lightbox.

Legenda da maletgs: Survista da las emissiuns tar RTR. RTR

In dals puncts culminants da quest tschintgavel SKJF vegn il chorical ad esser. In chorical è in musical nua ch’il chant da chor stat en il center. En il chorical che vegn chantà a Mustér van 1200 uffants a la tschertga da la melodia absoluta, la melodia che fa star eri il temp, la melodia che purifitgescha las olmas da las persunas ch’audan questa melodia. E tut quai sa chapescha grazia al chant en quatter linguas.

Mo il festival na consista betg mo dal chorical. Las aulas, baselgias e chapluttas en il conturn da Mustér vegnan a laschar resunar las vuschs giuvenilas, quai a concerts, lavuratoris u a preschentaziuns spontanas.

RTR accumpogna il SKJF e rapporta da las preparaziuns organisatoricas e musicalas. Ils «Cuntrasts» mussan co che Rilana Cadruvi prepara ses chor d’uffants da la Surselva per l’inscunter. Il radio rapporta er da las preparativas per il festival ed emetta en il rom da «l’Artg musical» plirs concerts.