Siglir tar il cuntegn

Header

cuntegn

Festa da musica Arosa 2019 Quai occupa avant la festa

Ensemen cun noss osp Curdin Brunold avain nus intunà la festa da musica chantunala ad Arosa.

En in’ura speziala (11:00-12:00) avain nus vulì discurrer davart inqual tema ch'occupa avant la festa da musica chantunala. Perquai avain nus envida Curdin Brunold, in um ch’è stà activ sia vita entira sco musicant. El ha dirigì numerus onns ed è stà funcziunari en la cumissiun da musica da l’uniun chantunala.
Plinavant avain nus visità il concert preparativ per la festa che las musicas da Danis/Tavanasa, Trun e Sagogn han dà ensemen. Là han ils dirigents da las trais musicas dà pled e fatg.

Preparativas

En vista a la festa da musica chantunala cumenzan bleras musicas gia baud a far dapli emprovas. Las musicas organiseschan fin d'emnas da preparaziun e fan collavuraziuns cun dirigents d'autras musicas u envidan dirigents da professiun. Igl è in temp intensiv per dirigents e dirigentas sco era per ils musicants e las musicantas.

Ils «canadiers»

Tar la dumonda dals uschè numnads canadiers van ils parairis savens dapart. Cugliunan las musicas sa sez cun emplenir lur rusnas u perfin rinforzar la musica cun musicants externs? U daventa quai pir grazia al sustegn supplementar pussaivel a la musica d’ir sin festa?
La pli confortabla situaziun è natiralmain quella sch’ins n’è visà sin nagins canadiers. En la realitad, in confort dal qual be paucas musicas pon discurrer ozendi.

Tensiun – spetgas

La spetga ad ina festa da musica è sut il stritg quella da vulair ir a far il meglier pussaivel. Il meglier pussaivel – quai po dentant variar fitg. Ils ins èn bain preparads e van cun buna conscienza a la festa e speran da pudair clamar il meglier pussaivel il mument ch’els han da sunar avant ils experts. Auters han anc la speranza da pudair meglierar ina u l’autra chaussa en l’ultim mument, per gist anc dar in ultim stausch avant la preschentaziun.

Il marschar

Ina festa da musica senza la concurrenza da marschar n’è simplamain betg il medem. Blers osps vegnan carmalads cunzunt era per guardar la concurrenza da marschar cun bleras binderas, unifurmas en tuttas colurs e magari perfin ils tamburs ch’accumpognan las musicas. Per blers musicants atgnamain ina tortura e tuttina nagin che pudess imaginar da star senza.

Aspectativas avant la festa

Las aspectativas èn tar ils dirigents savens cleras. Ir sin festa be per far il meglier pussaivel na tanscha insaco tuttina betg. Sunar il meglier e cuntanscher ils pli blers puncts da tuts, quai è la finala tuttina la gronda finamira – savens forsa era in zic secreta – dals dirigents.
Per musicantas e musicants stat il giudair l’atmosfera e far festa magari in zic pli fitg en il center.

RR actualitad 11:00