Eurosonic Festival: il segund di

Fitg buna musica, massada glieud cun buna luna e bischa sin 14 meters sur mar – quai è stà la gievgia a Groningen en l'Ollanda.

Fertant che l’emprim di da festival ha gì lieu en in rom anc pli pitschen ed il public era anc vi da sa stgaudar, è il segund di stà ina bumba. In genial concert suenter l’auter han spetgà nus. L’atmosfera e la variaziun da las localitads – simplamain impressiunant. Nus avain gì in bun nas en la selecziun dals concerts, qua ils favurits:

La band Warhaus sin tribuna cun cazzola oranscha. Avrir maletg en lightbox.

Legenda da maletgs: Warhaus en la Stadsschouwburg. RTR, Flavio Tuor

Warhaus da la Belgia

  • Extrem exact e fitg stgir pop cun duas bellezza vuschs
  • Differents instruments che vegnan plazzads sapientiv en pitschens detagls per cuntanscher l’effect maximal
  • Els èn sco ina droga, sch’ins ha ina giada contact cun els na vegnan ins betg pli davent

Musica sco in vegl e bun vin cotschen. Fitg ferm, bler volumen e grond caracter. Sch’ins taidla la vusch dal chantadur e chau creativ da Warhaus, Maarten Devoldere, pon ins esser segir ch'el vegn franc era a baiver da quai vin. I n’è betg in concert per la gronda massa. I è in concert per amaturs da musica, per in bun ami al qual ins vul dar vinavant in bun e grond tip da musica.

La band Her sin il palc, cun cazzola cotschna Avrir maletg en lightbox.

Legenda da maletgs: Her en la scola da musica Vrijdag. RTR, Flavio Tuor

Her da la Frantscha

  • Indie pop cun excurs en il soul e funk
  • Ina band fitg simpatica ed ambiziusa
  • Els han in grond maun per crear imnis, mintga chanzun finescha en in fieu artifizial musical

Fitg variond cun ina buna maschaida tranter chanzuns per sautar e da quellas da simplamain star en pe, tadlar e laschar purtar. Cun ina tenuta fitg modesta, simpatica ed engraziaivla han els tschiffà il public gia tar la segunda chanzun. Che la band ha in grond potenzial mussa era il fatg ch’els han sunà la davosa chanzun per l’emprima giada avant public – e quel era immediat intgantà.

Joan Thiele sin tribuna durant ses concert Avrir maletg en lightbox.

Legenda da maletgs: Joan Thiele en il Mutua Fides. Eurosonic, J. Baars

Joan Thiele da l’Italia

  • Ella è giuvna, freha e happy
  • Ha in bun maun per bunas chanzuns d’indie pop
  • Tschiffa ins immediat cun sia moda e na lascha betg pli liber ins

Ina simpla, nuncumplitgada giuvna Taliana cun ragischs svizras che vul conquistar il mund cun ses plaschair da viver ch’ella transmetta cun sia musica d’indie pop. Ella stat sin tribuna e vegn da transponer quai a moda impressiunanta. Ella è la cumpogna ch’ins giavischa, cun ella è la vita simplamain meglra. Accumpagnada tras il concert vegn ella da sias figuras animadas che sautan davos ella, projectadas sin la paraid. Quai che suttastritga sia moda – e sch’ella na dumogna ina giada betg da divertir, sche lura garantì sias figuras.