Siglir tar il cuntegn

Eurosonic Ils highlights dal Eurosonic 2018

Sch’ils musicists da damaun s’entaupan cun bookers e schurnalists da musica a Groningen, lura è il temp dal pli grond «Showcase-Festival» da l’Europa. Durant trais dis vegn scuvrì musica, ils programs per ils festivals vegnan amplifitgai ed i vegn tratg blers fils entaifer la scena da musica.

La chasa dal artist village dal Eurosonic.
Legenda: Bainvegni tar il Eurosonic. Eurosonic, Jorn Baars

Ensemen cun l’entira scena da musica da l’Europa ha era RTR visità il Eurosonic 2018 en la fraida e bletscha citad da students Groningen.

La missiun: scuvrir per vus la musica da damaun.

Scarlet Pleasure dal Danemarc

  • Hipster-Pop modern
  • Il chantadur vesa ora in zic sco Nick Carter dals «Backstreet Boys»
  • Porscha ina coola show e ha chanzuns cun grond potenzial per radio

Sigrid da l’Islanda

  • Precis uschia vegn la musica da pop da damaun a tunar
  • Avess merità in premi per buna luna
  • Ella è la pitschna dunna cun la gronda vusch, da la quala nus vegnin anc ad udir bler

IAMJJ dal Danemarc

  • El fa ina maschaida ch’ins pudess numnar «Tarantino-psycho-western-sound»
  • In um cun ina vusch sco in urs
  • Sia musica na sa faschess betg be bain en in film da Tarantino, mabain va era bain en il radio – perquai è el gia d’udir tar nus al Radio Rumantsch!

Cari Cari da l’Austria

  • Ins po metter els dal stil nà en il medem truchet cun «Me + Marie»
  • La chantadura è ina extrema multi instrumentalista – ella sa par exempel era imitar cun sia vusch ina trumbetta
  • Il duo dumogna da tschiffar il public cun sia musica e na lascha betg pli liber fin a la fin

Gizmo Varillas da l’Engalterra

  • Indiepop melancolic che va bain a prà per la fin da la stad
  • Avessan «James Gruntz» e «José Gonzalez» ensemen in uffant, fiss quai «Gizmo Varillas»
  • Cun el ans pon ins giaschair enavos en il sessel e giudair il bel da la vita – il meglier cun tadlar il Radio Rumantsch, nua ch’el è gia sin la playlist

Superorganism da l’Engalterra

  • Els bittan tut ils stils da musica en ina chaldera e destilleschan lura viadora l’essenza per els
  • La chantadura vesa ora sco ina scolara giapunaisa da 14 onns entamez ina mega show
  • Ils schurnalists da musica èn tuts dal medem maini: ad els auda il futur

Jacob Banks da l’Engalterra

  • Cun sias grondas chanzuns è el il pendant musical tar Adele
  • Quai è stà il concert che ha tratg ils pli blers aspectaturs. Talmain blers che ina gronda part ha stuì spetgar ordaifer en la plievgia senza udir be in sulet tun dad el.
  • 2018 vegn a daventar ses onn – il fundament ha el mess al Eurosonic

Great News da la Norvegia

  • Indiepop per sa sentir bain cun in grond factur per imnis
  • Els èn ils umens dal nord che fan la musica per in di perfetg a la riva en il sid
  • Buna musica dovra halt adina in zic pli ditg enfin ch’ella vegn scuvrida, mo era els vegnan a dumagnar il pass en ils radios e sin las tribunas da noss pajais

Isaac Gracie da l’Engalterra

  • Il recept è simpel: ina bella e gronda vusch e bellas melodias da pop – da tut quai ha el pli che avunda
  • Da la cumparsa fa el endament «Kurt Cobain» – musicalmain dentant plitost «James Bay»
  • Curt e concis: tgi che fa talmain bella e buna musica cuntanscha franc il success, da quai essan persvas

Tgi che ha scrollà fin giudem survegn uss in per impressiuns