Uschia tuna l'Europa damaun

Durant quatter dis è la scena da musica nova sentupada a Groningen al Eurosonic Festival. Durant quels dis è vegnì fatg fitg bler musica, ins ha pudì discutar, analisar e filosofar giudlonder tge ch’èn actualmain ils trends e tge che vegn ad occupar nus en il proxim temp.

Ina chasa cun projectà in maletg dal Eurosonic. Bild in Lightbox öffnen.

Legenda da maletgs: Vista sin l'artist village dal Eurosonic Festival. Eurosonic, Knelis

Era la redacziun da musica da RTR è sa bittada en il tumult a la tschertga da la musica da damaun. Quest'emna preschentain nus tschintg acts dals quals nus pensain ch’els vegnan ad esser ils stars da damaun che vegnan ad influenzar tge che vegn a vegnir tadlà:

Møme da la Frantscha

  • Hippster electro che plascha cunzunt a las giuvnas
  • DJ, electro e ghitarrist – tut en in pachet
  • Fitg grond plaschair da giugar

Il sulet problem che Møme ha anc è ch’ins n’enconuscha betg el. Sch’ins giess tenor tut l’auter stuess el gia esser mega enconuschent. El porscha ad ins tut per ina perfetga notg da party. El tschiffa ins cun easy sound a la bar, tira ins empernaivlamain vi sin l’iral da sautar e chatscha lura ad ins il suaditsch. I dat actualmain tants acts electronics che curseschan da tribuna tar tribuna, da blers da quels sa differenziescha el. Pertge tar el survegn'ins in tschert kick musical – in kick ch’ins na po betg descriver. Quai è la pitschna e fina differenza daco ch’el sa metta atras sco live act.

Fil Bo Riva da l’Italia e Germania

  • Folk en ina nova nunusitada furma.
  • Il bass vegn sulettamain da la percussiun, l’accumpagnament vegn da la ghitarra electrica e lura il Fil Bo Riva cun sia marcanta vusch e la ghitarra acutstica.
  • Cun sia vusch sa metta el en retscha cun Annenmaykantereit u Faber.

Che quai stil da musica funcziuna han Annenmaykantereit e Faber gia mussà, els han uss quasi gia fulà via per Fil Bo Rive. El posseda quai ch’ins dovra, el è benedì cun ina bella vusch da fim, ha in grond talent musical ed in bun maun per crear chanzuns. Il sulet manco ch’el ha anc èn sias qualitads d’entertainment sin tribuna. El para fitg schenà e fa la parita da na betg divertir gugent il public. Sch’el vegn da meglierar quai punct e sa sviluppar era en quai grau, na stat nagut pli en via per ina gronda carriera dal simpatic giuven.

Her da la Frantscha

  • Indie pop cun excurs en il soul e funk
  • Ina fitg simpatica ed ambiziusa band
  • Els han in grond maun per crear imnis, mintga chanzun finescha en in fieu artifizial musical

En la scena n’èn els atgnamain gia daditg betg pli in tip secret. Ch’els han merità en il mainstream ses plaz quai han els demussà cun lur concert al Eurosonic. Els han tut las qualitads che stars dovran: els scrivan chanzuns per il chor ed els san co ins divertescha e tschappa il public. Tar els èsi be pli ina dumonda dal temp enfin ch’i va per els ferm ensi vers en las sferas autas dal mainstream.

Warhaus da la Belgia

  • Extrem exact e fitg stgir pop cun duas bellezza vuschs
  • Differents instruments che vegnan plazzads sapientiv en pitschens detagls per cuntanscher l’effect maximal
  • Els èn sco ina droga, sch’ins ha ina giada contact cun els na vegn'ins betg pli davent

Musica sco in vegl e bun vin cotschen. Fitg ferm, bler volumen e grond caracter. Sch’ins taidla la vusch dal chantadur e chau creativ da Warhaus, Maarten Devoldere, pon ins esser segirs, el vegn franc era a baiver da quai vin. Cun lur musica na vegnan els betg a sa tschentar en il mainstream, per gliez è la musica memia speziala e drizzada ora sin amaturs da lur gener. Cun els èsi sco cun il vin – ins n’avra betg mintgadi ina da las meglras buttiglias.

Joan Thiele da l’Italia

  • Ella è giuvna, freha e happy
  • Ha in bun maun per bunas chanzuns d’indie pop
  • Tschiffa ins immediatamain cun sia moda e na lascha betg liber ins pli

Ina simpla, nuncumplitgada giuvna taliana cun ragischs svizras che vul conquistar il mund cun ses plaschair da viver, ch’ella transmetta cun sia musica d’indie pop. Ella tutga tant cun sia cumparsa sco era cun sia musica cumplettamain il gnerv dal temp. Per ella pon ins be sperar ch’il grond e nausch mund da musica na dumogna betg da traplignar quella bella e fina flur – lura vegn quai bun.

Møme da la Frantscha

  • Hippster electro che plascha cunzunt a las giuvnas
  • DJ, electro e ghitarrist – tut en in pachet
  • Fitg grond plaschair da giugar

Il sulet problem che Møme ha anc è ch’ins n’enconuscha betg el. Sch’ins giess tenor tut l’auter stuess el gia esser mega enconuschent. El porscha ad ins tut per ina perfetga notg da party. El tschiffa ins cun easy sound a la bar, tira ins empernaivlamain vi sin l’iral da sautar e chatscha lura ad ins il suaditsch. I dat actualmain tants acts electronics che curseschan da tribuna tar tribuna, da blers da quels sa differenziescha el. Pertge tar el survegn'ins in tschert kick musical – in kick ch’ins na po betg descriver. Quai è la pitschna e fina differenza daco ch’el sa metta atras sco live act.

Tant tar nossa prognosa. Nus avain era vulì savair dal festival manager dal Eurosonic Festival Peter Sikkema sia prognosa musica per il 2017: