Tar chors, dirigentas e dirigents e tar tuts che han da far cun il chant rumantsch pon ins chattar notas – u sin curuna, en stiva u en ina trucca si surchombras. Quai è bun ed endretg ma uschespert ch'ins vuless chantar ina chanzun rumantscha nunenconuschenta èsi grev da chattar las notas. Ina soluziun porschan Andy Reich e Luzius Hassler da l'ICT Atelier.
chorliteratur.ch
La collavuraziun tranter Luzius Hassler ed Andy Reich ha cumenzà cun ina scolaziun. Luzius Hassler ch'è stà docent da musica a la scol'auta da pedagogia ha s'interessà per novas tecnologias en il mund da la musica. Sco lavur da diplom ha el ponderà, tge pussaivladads ch'i dess per gidar a dirigentas e dirigents da vegnir tar las notas. Andy Reich, administratur da l'ICT Atelier, è medemamain s'interessà per quest tema ed ha fatg la proposta da concepir ina plattafurma d'internet. Uschia è la pagina chorliteratur.ch naschida. Là san ins ussa tschertgar notas per musica da chors e cumprar in u plirs exemplars.
L'Appenzellais e la musica rumantscha
Luzius Hassler è creschì si el chantun Appenzell e chapescha, ma na discurra betg rumantsch. Tuttina s'engascha el fitg per mantegnair la cultura da chant rumantsch.
Jau hai gì il cletg che jau n'hai betg chattà ina plazza suenter il studi. Uschia sun jau sa tschentà ad Andeer e là hai jau chattà il plaschair vi da la musica rumantscha.
Suenter ses studi en la scola auta da pedagogia n'ha Luzius Hassler betg chattà ina plazza en la Bassa. Perquai ha el surpiglià ina plazza ad Andeer. Là ha el dirigì divers chors ed uschia chattà il plaschair per la musica rumantscha. In inscunter cun il cumponist Benedetg Dolf ha lura sveglià l'idea da scriver en net cumposiziuns rumantschas. En emprima lingia per mantegnair quellas da Benedetg Dolf, ma en il decurs dals onns èn anc insaquants auturs vegnì tiers. Ed uschè ditg che Luzius Hassler ha anc plaschair vi da quella lavur, uschè ditg vul el era anc far enavant.
Sche jau vegn 100 onns vegl, fatsch jau simplamain enavant cun quai, perquai ch'igl è ina lavur uschè fascinanta.
RR actualitad 11:00