Siglir tar il cuntegn

Header

cuntegn

2017 - Festival da jazz Il 10avel Festival da jazz

Ils ultims 10 onns è il Festival da jazz daventà in eveniment cun gronda reputaziun. Per il festival da quest onn vegnan interprets da renum sco ils americans Lee Ritenour, Herbie Hancock, Chick Corea ubain il pianist franzos Michel Legrand a San Murezzan.

Il 2007 hai dà per l’emprima giada in pitschen festival cun in pèr concerts en il Dracula Club a San Murezzan. Cun gronda perseveranza, engaschament ed idealissem ha Christian J. Jenny persequità sia idea. Il festival cun num rumantsch «Festival da jazz» è uschia creschì ad in crescher ed è daventà in eveniment da num e da pum cun gronda reputaziun.

Ils stars dal jazz mundial vegnan en il Dracula Club

Il program è vegnì mintg’onn pli internaziunal ed ils nums pli prominents. Stanley Clarke, Billy Cobham, Paul Kuhn, Al di Meola, Al Jarreu, Monty Alexander, Bobby McFerrin, Klaus Doldinger, Marcus Miller e blers auters èn sa preschentads sin il palc dal Dracula Club, procurond per sairadas nunemblidaivlas. Gist pervi da l’atmosfera quasi intima en quest local cun 200 aspectaturas ed aspectaturs èn ils concerts er daventads enconuschents, e blers dals protagonists èn stads fascinads e perquai èn els er turnads gugent ils onns sequents.

10 onns festival da jazz cun in program excepziunal

Helge Schneider cun in parisol ed ina chapellina enta maun.
Legenda: Helge Schneider. MAD

Per il 10avel Festival da jazz datti plirs revairs cun stars dal jazz che vegnan dal Be Bop fin tar il jazz da fusiun, cun interprets da renum sco ils americans Lee Ritenour, Herbie Hancock, Chick Corea u The Manhattan Transfer, il pianist franzos Michel Legrand ubain Fazil Say, in pianist tirc che vegn da la musica classica. Il program dal Festival da jazz da giubileum na fiss però betg cumplet senza in pèr surpraisas e tuns nunusitads: il violinist brit Nigel Kennedy, la bassista polaca Kinga Glyk, la pianista giapunaisa Hiromi, l’accordeonist virtuos Richard Galliano – e sco ivetta tut atgna e speziala er l’entertainer e musicist Helge Schneider, enconuschent per ses concerts sulvadis, curius e zunt divertents.

Artitgels legids il pli savens