Siglir tar il cuntegn

Header

cuntegn

2017 - Festival da jazz WHAT THE JAZZ...?

En ina seria da videos sco era in’entira ura live al radio declera il musicist da professiun Lucas Schwarz il jazz e co ins po s’avischinar a quel.

Purtret da Lucas Schwarz
Legenda: Il musicist professiunal, Lucas Schwarz ha declerà oz durant in'ura il jazz. RTR, Dominik Hardegger

En ils videos sura avain nus pudì emprender d’enconuscher il standard da jazz «Someday my prince will come» ed ils instruments en ina pussaivla constellaziun da quartet dal jazz. Mo tge è il jazz insumma? En tge chantun pon ins posiziunar quai stil da musica che vegn savens menziunà, forsa senza ch’ins sa da tge ch’i sa tracta exact.

audio
Jazz per «dummies» – La suppa da giutta da la musica
00:23 min, Actualitad dals 25.07.2017.
laschar ir. Durada: 00:23 minutas.

Il jazz è sco ina schuppa da giutta

Jazz maschaida ed integrescha differents elements sco blues, gospel, swing, worksongs, etc....Ils americans cumpareglian il jazz cun ina schuppa da gumbo – tar nus fiss quai pia in zic sco la schuppa da giutta.

audio
Jazz per «dummies» – Il swing è l'element il pli tipic
01:02 min, Actualitad dals 25.07.2017.
laschar ir. Durada: 01:02 minutas.

Il swing – in dals pli impurtants elements

Il swing è l’element ritmic en il jazz. El è quel ch’animescha da sautar e sa muventar. Quai sentiment survegnan ins perquai che las fridas 2 e 4 survegnan la paisa en il swing. En emprima lingia è la battaria responsabla per quai feeling.

audio
Jazz per «dummies» – Structura e standarts
01:12 min, Actualitad dals 25.07.2017.
laschar ir. Durada: 01:12 minutas.

Co pon ins chattar ina structura en il jazz?

Tar la musica da pop è quai fig simpel da survegnir il sentiment structurà. Suenter in’introducziun vegn la strofa, suandada dal refrain. Il refrain è simpels e manglass ir spert en l’ureglia uschè ch’ins po chantar u tschivlar cun.

Quai n’è era betg bler auter tar il jazz. I dat ina introducziun e silsuenter ina melodia centrala. Quella na vegn dentant savens betg chantada, mabain è sulettamain instrumentala. Silsuenter suondan ils solos dals differents instruments.

audio
Jazz per «dummies» – Sco sin plazza da gieu, tuts dattan tut
00:37 min, Actualitad dals 25.07.2017.
laschar ir. Durada: 00:37 minutas.

Daco sunan adina tut ils instruments solos en il jazz?

Il jazz è da cumparegliar cun ina plazza da gieu. I dat massa tramagls, e sch’il musicist è averts e creativs po el giugar cun tut ils elements che la musica porscha e mussa uschia lur virtuosadad ed abiltads.

audio
Jazz per «dummies» – Cun il sket vegn immità instruments cun la vusch
00:50 min, Actualitad dals 25.07.2017.
laschar ir. Durada: 00:50 minutas.

Tge èn quels tuns spezials ch’ils chantadurs da jazz fan savens en il jazz?

Quai numnan ins il «scat». Il chantadur prenda singulas silbas e ritmisescha quellas. La lingua tuna uschè quasi sco in linguatg d’uffants che n’exista atgnamain betg. Il senn davostiers è ch’il chantadur imitescha uschia cun sia vusch in instrument.

audio
Jazz per «dummies» – Il Riff che sa repetta
00:45 min, Actualitad dals 25.07.2017.
laschar ir. Durada: 00:45 minutas.

Era il «riff» vegn duvrà savens e po gidar da chapir

Il riff è ina frasa che va fitg spert en l’ureglia e che vegn repetida durant l’entira chanzun. Il riff nascha l’emprim e l’entira chanzun vegn cumponida enturn quella idea dal riff. Entras quai element repetitiv po l’auditur s’orientar meglier. En il jazz schabegia tant bler entaifer curt temp, quai che po magari spert surdumandar, uschia che quai element simpel e cler è in bun instrument per dar sustegn.

Cun tge stil dal jazz poss jau m’avischinar il pli simpel?

Ils vegls standards da jazz dattan il pli simpel access al jazz. Els han veglias e simplas melodias che derivan da l’entschatta dal 20avel tschientaner. Melodias ord musicals sco pli tard era ord films da Hollywood. Quellas chanzuns eran da lez temp la musica da pop.

audio
Jazz per «dummies» – Il smooth Jazz sco bun access
00:28 min, Actualitad dals 25.07.2017.
laschar ir. Durada: 00:28 minutas.

Smooth jazz

Quai è il stil da jazz ch’è il pli savens enturn nus, e quai tgunsch senza che nus remartgain insumma quai. Quai è la musica che nus udin en l’ascensur, en la lounge da l’hotel, durant far cumissiuns u era al telefon durant spetgar fin ch’ins vegn collià cun la persuna giavischada. Quella musica vegn duvrada explicit en tals lieus, perquai ch’ella è ruassaivla, betg dominanta, mabain animescha da cumprar u quietar.

RR actualitad 11:00

Artitgels legids il pli savens

Scrollar a sanestra Scrollar a dretga