Durant noss trais dis a Groningen avain nus visità radund 30 concerts. Avain tadlà chantauturas, DJs, rockers, e musicists electronics. Per part tuns fins che han derasà ina bellezza atmosfera, per part tuns pli dirs ch'han fatg buglir il sang e per part era tuns scurils, ch'ins n'è betg segirs sche quels plaschan u betg. Tranter tut quels artists èn trais dads en egl spezialmain a nus.
Avec
-
Bild 1 von 2. Ella ha savì sunar avant in grond public la giuvna Avec. Bildquelle: RTR, Dominic Pohle.
-
Bild 2 von 2. Il public era intgantà da la vusch extraordinaria d'Avec. Bildquelle: RTR, Dominic Pohle.
La giuvna chantautura austriaca ha per propi num Miriam Hufnagl ed ha 23 onns. Sia cumparsa sin tribuna è sin l'emprima egliada in pau modesta e simpla. Quai sa mida dentant, uschè spert ch'ella cumenza a chantar. Cun sia vusch extraordinaria chanta ella chanzuns da pop tschiffantas che persvadan cun bels details sco per exempel ils instruments da flad che accumpognan. Finalmain puspè ina giada musica da pop fatga acustica senza firlefanzas electronicas.
Kawala
-
Bild 1 von 2. Ils simpatics giuvens da Londra han persvadì cun lur energia durant il concert. Bildquelle: RTR, Dominic Pohle.
-
Bild 2 von 2. Al Eurosonic Festival a Groningen èsi vegnì sunà en bler differents lieus. La gruppa Kawala qua ha per exempel savì sunà en ina baselgia. Bildquelle: RTR, Dominic Pohle.
Gia suenter ils emprims per pleds han ins stuì avair gugent ils giuvens da la gruppa Kawala. Jim Higson e Daniel McCarthy da Londra interageschan fitg simpatic cun il public, fan sgnoccas e na sa prendan sasez betg memia serius. Quai è l'emprim che croda si tar els. Lu persvadan els dentant cun l'energia ch'els mettan en lur musica. Senza retegnientschas saglian e sautan els per la tribuna enturn durant sunar e chantar lur tipic indie-pop englais.
Elderbrook
-
Bild 1 von 1. Elderbrook ha savì persvader cun musica electronica. Bildquelle: MAD, Eurosonic.
Elderbrook fa musica electronica ed è sez l'ovra electrica che dat l'energia. Sin tribuna mida il giuven englais Alexander Kotz tranter plirs synthesizers, keyboards ed in drum pad. Quai cumplettescha el cun sia vusch varianta. Musica che fiss perfetg per in club che n'ha dentant er betg da sa zuppar dals radios gronds.
Ulteriuras scuvridas
-
Bild 1 von 6. Bishop Briggs da Londra. Bildquelle: RTR, Dominic Pohle.
-
Bild 2 von 6. Lenny da la Tschechia. Bildquelle: RTR, Dominic Pohle.
-
Bild 3 von 6. The Holy da la Finlandia. Bildquelle: RTR, Dominic Pohle.
-
Bild 4 von 6. The Slow Readers Club da Manchester. Bildquelle: RTR, Dominic Pohle.
-
Bild 5 von 6. Blackwave. da la Belgia. Bildquelle: MAD, ESNS Festival.
-
Bild 6 von 6. Rimon dal pajais bass. Bildquelle: MAD, ESNS Festival.
Quels artists n'han betg dumagnà il segl en nossa top 3 valan dentant era la paina da tadlar:
- Bishop Briggs: Gronda vusch cumbinà cun gospel ed elements moderns.
- Lenny: Vusch da fim s'inscuntra cun instruments da flad e power-pop.
- The Holy: Rock extatic finlandais uschè dirs sco l'enviern en lur patria.
- Slow Readers Club: L'essenza da las meglras indie-bands englaisas dals onns 2000.
- Blackwave: Oldschool hip hop cun Sektion Kuchikästli samples.
- Rimon: R'n'B, rap e jazz per corp ed olma.
RR actualitad 09:30