20:00 All XS
All XS lantscha l’emprima saira da 8x15. en il territori svizzer talian. Els na vesan dentant betg sco dischavantatg u schizunt sco rolla da pre-band. Els vegnan a preschentar lur songs ils pli «fetzigs» pruvar uschia da persvader al public. Il viadi el Tessin s’ha en mintga cas gia sa rendì. Il lieu e l’aura saja «super» per uschia in eveniment, manegia la band.
20.25 Kaufmann
Tranter las otg furmaziuns dal 8x15. èn er duas grischunas. In da quels è Reto Kaufmann da Cuira. Per el èsi l'emprima giada suenter trais onns ch'el visita puspè il Tessin ed el è fascinà da la culissa: "Igl è anc bler pli bel che quai che jau hai m'imaginà ed er l'aura è stupenta - igl è simplamain perfetg.
20:50 F. Way
Per F. Way èsi questa saira in gieu da chasa. La band da rock è creschida si mo gista dasper Carasso. Pia èsi per els ton pli in’onur ed il plaschair da pudair sunar al emprim 8x15. el Tessin. Per els èsi l’emprima giada ch’els pon sa preschentar ad in public da l’entira svizra.
21:15 Mark Kelly
Direct, divertents e cunter mintga stress e squitsch. Uschia vegn Mark Kelly preschentà en text da pressa, ed uschia è’l era propi. Mark Kelly na vegn betg ad in 8x15. per ch’il mund emprenda ad enconuscher ad el. Mark Kelly vegn ad in 8x15. Per derasar ina buna atmosfera e pudair chantar sia musica. “No pressure” - nagina pressiun è il motto dal chantadur da Losanna ch’è uriund da Manchester. Pertge sut pressiun na dettia betg buna musica.
21:40 Jack Slamer
Er tuns da rock'n'roll resunan tras las vias da Monte Carasso. Ils musicists èn persvadids che las 15 minutas ch'els han a disposiziun tanschian per persvader il public. En quellas vegnian els a preschentar "dretg rock".
Bands da pop datti avunda. Er bands da rock'n'roll datti avunda, ma qua avain nus chattà noss plaz.
21:55 Ursina
La segunda furmaziun grischuna è ina da las fatschas da la scena da musica rumantscha: la chantadura sursilvana Ursina. Pervia da l'atmosfera dad open air cun la tribuna ordadora haja ella cunzunt tschernì chanzuns pli "rockigas" da ses repertori, sch'ins sappia insumma duvrar questa noziun per sia musica. La lingua na vul ella però betg adattar al public, uschia ch'ella chanta per rumantsch ed englais en il Tessin.
Blers auditurs na taidlan gnanc exnum sin il text, mabain sin la melodia. Ed il rumantsch tuna enormamain bel, pertge na vess jau lura betg da chantar per rumantsch en territoris betg rumantschs?
22:30 Poche Spanne
Sch’els sajan la vusch dal rap tessinais? – Gea, quai possian ins schon dir uschia, manegian ils dus rappunz da Poche Spanne. Ma i dettia anc blers auters rappunz tessinais sin lur nivel. La difficultad qua al 8x15. saja simplamain che blers na sappian entschaiver nagut cun rap. Els emprovian dentant da far lur chaussa e da persvader cun esser sasez.
22.55 Šuma Čovjek
Ils 10 musicists cun ragischs svizras-bosniacas-algeras fineschan il 8x15n a Monte Carasso. Tar lur chanzuns na va la band multi culturala betg suenter il recept ina chanzun, ina lingua - na els dovran pliras linguas per ina chanzun. Cun quai veglian ins celebrar la varietad da linguas ch'i dettia er en Svizra. Nus vivian en differentas linguas, nus amian en differentas linguas ed a quai duain ins laschar spazi. En il Tessin speran els da pudair cuntanscher en public ch'els na cuntanschan uschiglio betg cun questa musica multiculturala.