Open Air Lumnezia - Las bands dal venderdi vegnan a pled en Lumnezia

Royal Riot

Els èn l’emprima band che suna senza forz’electrica a l’Open Air Lumnezia: Royal Riot.

Venderdi suentermezdi esi stà plitost quiet en la Val Lumnezia. Senza forz’electrica na datti nagins concerts sil palc, pertge tut funcziuna cun moniturs, autpledaders ed amplifitgadurs.

Ina band ha però salvà la situaziun: Royal Riot, ils victurs dal contest da talents da l’onn passà, han suna unplugged, e lur concert spontan ha diverti il public.

Damian Lynn

Damian Lynn ha quest onn gudagnà in Swiss Mucic Award, era gia sin turnea cun Stefanie Heinzmann e Bligg e daventa pli e pli enconuschent.

Tuttina èsi anc ina lunga via, sco el di sez. In tschert stil ha el dentant gia chattà cun ses apparat da far «loops». Uschia po el sveltamain registrar riffs u chant sin tribuna e maschadar/repeter quels. Ma el na sa sentia mai sulet, saja quai ch’el è en viadi sulet u cun ses drummer. Suenter ils concerts baiva Damian numnadamain savens ina gervosa ensemen cun auters musicists – en Lumnezia cun Dodo.

Dodo

Buna luna suenter la gronda plievgia ed ils chametgs – cun Dodo.

Dodo, il musicist da reggae svizzer, quel dal «Hippie-Bus», è vegnì oz a Degen per sa preschentar sin il palc da l’Open Air Lumnezia. Gia sin via vers la val da la glisch ha el però vis che las nivlas eras stgiras. Ed a la fin, suenter ch’il providiment electric funcziunava puspè, ha el fatg musica cun bler sulegl.

Wanda

Ier anc a Minca, oz levà amez ils culms. Il chau da Wanda, Marco Michael Wanda, ha cumpareglià l’Open Air Lumnezia cun ina cuntrad’auta en Scozia.

Uschia han Wanda er giudì in café en il vitg da Degen. A l’interrupziun d’electricitad han ils musicist fatg frunt e sunà unplugged. Tuts commembers da Wanda han gugent las fullas da glieud, els dovran «action». Lur imni «Bologna» han els er purtà en Lumnezia, ensemen cun ina buna purziun amur.

John Newman

L’ultima fin d’emna era John Newman anc al Gurten Festival. Ed empè da far in’emna vacanzas en Svizra ha el svelt stuì ir a New York, be per lura vegnir a l’Open Air Lumnezia.

Ed igl è stà in’arrivada sco en sia patria. Cura ch’els èn charrads vers l’areal da l’open air ha el ditg envers ses collegas da band: «Atgnamain èsi qua sco a chasa tar nus en l’Engalterra dal Nord».

Empè da daventar musicist vuleva John atgnamain daventar mecanist da töffs. E fin oz è quai per el insatge special, er per ruassar mentalmain.

Per il concert a l’Open Air Lumnezia dat el 100%. Pertge: Sch’ils visitaders stattan davant tribuna cun ina mesa baracca da la saira passada – e quai anc en tutta plievgia – lura è quai ina obligaziun.

Fitg simpatic, quest John Newmann cun sia vusch unica.