L'areal da festival è in zic ordvart dal vitg da Nufenen. Zuppà en il guaud e circumdà da la muntogna. L'Openair Rheinwald è enconuschent per sia atmosfera famigliara ed ils musicists e las musicistas naziunalas. Star ensemen, baiver in sitg e quest onn era giudair la bell'aura. Per far quai vegnan las visitadras da lunsch e da manaivel:
Davant la tribuna èn mintgatant blera, mintgatant pauca glieud. Intgins sautan, auters stattan a sulegl ed anc ina giada auters tschertgan la sumbriva en lur tendas. Quellas èn repartidas enturn l'areal principal nua ch'i dat bars e stans per mangiar. Gist quai stiman las visitadras ed ils visitaders, di Gioanna Meuli ch'è part da la suprastanza dal Openair Rheinwald.
Ins enconuscha in l'auter e sche betg emprendan ins d'enconuscher in l'auter tar ina gervosa.

Era quest onn èn musicistas e musicists dal Grischun sa preschentads sin tribuna. Tranter auter Giganto, Okto Vulgaris e la chantadura Sursilvana ANIKK. Era sia chanzun «Tgi eis ti?» ch'è vegnida elegida sco 50avel Top Pop Rumantsch è stada dad udir.