Dasper tut ils lauds da l'ultim temp datti dentant era puncts da critica. Il concert al Open Air Lumnezia ha, malgrà la victoria dal contest da la Startrampe, betg pudì persvader dal tut. Al Open Air Malans ha Mattiu Defuns gì la sfida da cumenzar sco opener avant in areal quasi vid. Ed era qua ha el betg persvas noss criticher da musica Patrick Capaul.
Suenter il concert avain nus confruntà il musicist da Trun cun nossa critica «dovri in proxim pass». Quai vesa Mattiu era en sez. La gronda dumonda saja be co e tgenin?
Ins po dentant anc avair siemis. E sch'el pudess giavischar, lura fissi d'ina vart da pudair ina giada ir sin turnea da clubs durant l'enviern. Quai saja dentant pli grev d'organisar che ina turnea da festivals durant la stad. Ed il segund giavisch fiss da survegnir in management che coordinescha ed organisescha concerts, turneas ed autra rauba. Il mument fa quai il musicist numnadamain anc sez. E quai na saja betg insatge ch'el fatschia uschia gugent.
RTR/ Turnea da festivals