Siglir tar il cuntegn

Header

Navigaziun

Mathias Caprez sta cun ils mauns en giaglioffa sil areal dal Open Air Malans.
Legenda: Mathias Caprez - dapi 10 onns voluntari al Open Air Malans. RTR, Oceana Galmarini
cuntegn

Open Air Malans Pertge investir uschè blera lavur en in festival pitschen?

Mathias Caprez è in dals blers voluntaris als numerus festivals grischuns. Dentant pertge gida el dapi 10 onns en differentas funcziuns al Open Air Malans?

Igl Open Air Malans ha gì l'onn passà bun 700 aspectaturs. Da l'autra vart gidan mintg'onn bun 100 voluntaris d'organisar e manar atras il festival en il guaud. In dad els è Mathias Caprez. El ha gia gidà en differentas funcziuns, uschia è el per exempel era gia stà part dal comité d'organisaziun.

Mathias lavura sco fiduziari e sa uschia, quant che sia lavur e quella lavur da tut ils auters avess custà al Open Air Malans – sch'ins pajass ina paja normala. Il pitschen festival fascinescha – n'è dentant nagin model da fatschenta rentabel.

blera buna atmosfera - ma betg la gronda fatschenta.
Legenda: Blera buna atmosfera - ma betg la gronda fatschenta. RTR, Oceana Galmarini

Dentant saja il gudogn era betg la motivaziun d'investir uschè bler temp en in festival. Pli grond saja il plaschair da pudair crear insatge unic e cunzunt era las experientschas ch'ins po rimnar e la engraziaivladad che vegn da la glieud or da la regiun.

Il Open Air Malans attira in vast public da l'entira regiun.
Legenda: Igl Open Air Malans attira in vast public da l'entira regiun. RTR, Oceana Galmarini

Ed uschia pon ins en il Grischun ir a visitar numerus pitschens festivals, organisads da voluntaris sco Mathias. Bleras uras organisar, fabritgar e decorar per ch'in pèr tschient persunas da la regiun pon far dus dis festa amez il guaud.

RTR, Turnea da festivals