Gian Carlo Simonelli – il num tradescha gia ses origin talian ma er ses origin musical. Ses bab ha fundà la chapella «Engadiner Ländlerfründa» ensemen cun Arno Caflisch e Christian Müller e dapi il 1985, cun 19 onns è el sez era commember da la renumada chapella da musica populara. Gian Carlo è creschì si cun musica populara ma el ha in orizont vast da musica ch'interessescha e plascha ad el.
A mai plascha musica dad A fin Z, dals Alder-Buebe fin ZZTop.
Cura ch'el aveva dus onns ha ses bab Carlo Simonelli fundà la chapella e gia là ha Gian Carlo adina vulì che la porta da sia chombra restia averta cura che ses bab ha exercità ensemen cun Arno Caflisch e Christian Müller, a chasa en chadafieu. Uschia è el creschì en questa «istorgia» sco el di. Era pli tard sin la plazza da scola n'è quai stà nagin tema ch'el fa musica populara. El era Gian Carlo, il clarinettist.
Durant il seminari da magisters a Cuira è Gian Carlo vegnì en contact cun furmaziuns da musica pli grondas, la Musica dals cadets per exempel e suenter il seminari cun la musica militara ed uschia cun ina furmaziun d'instruments a flad. El s'interessescha fitg per la musica populara da blers pajais, spezialmain er per quella da l'Italia. Gian Carlo Simonelli è mez Talian e dapi passa 50 onns va el adina puspè en vacanzas en la chasa che la famiglia posseda al Lago di Como.
Chant e hardrock
Ma er autras musicas popularas interessan il multi-instrumentalist. Ladina, la dunna da Gian Carlo, è fitg engaschada en la scena da chors grischuna e dapi intgins onns fa era Gian Carlo part al Chor mixt Champfèr, malgrà ch'el n'aveva atgnamain mai pudì s'imaginar ch'el chanta ina giada en in chor. Sper il chant taidla el dentant er autra musica. El saja avert per tut, era per la musica da pop, per exempel da ABBA sco er da musica da rock u musica da country.
Emissiuns cun Gian Carlo Simonelli:
Fyrabigmusig sin SRF Musikwelle dals 12-05-2026:
Profil dals 10-09-2011:
