Siglir tar il cuntegn
cuntegn

8x15 8x15. – 30 da november en il Salzhaus a Brugg

Gia per la segunda giada è il Salzhaus da Brugg stà il patrun-chasa dal project «8x15.», il project da Radio SRF Virus che promova bands giuvnas svizras. Er quella giada vegnan las bands da tut las regiuns da la Svizra. Tawnee da Turitg e da l’Engiadina han represchentà il Grischun.

Tawnee

... valan sco band turitgaisa, ma atgnamain èni Grischuns. “Jamie” ha gì in bun airplay en ils radios da la Svizra, la versiun rumantscha aud’ins anc adina savens en il Radio Rumantsch. Ed er sch’il sound è vegnì pli dir ils ultims onns, il scharme grischun, quel è restà.

Black Sea Dahu

... .. è il nov num da l’anteriura band “Josh”, ed els sunan in indie-folc-rock melodius. La band turitgaisa enturn la chantadura Janine Cathrein persvada entras la maschaida dad arranschaments da bellezza cun ina vusch stgira che stgauda il cor.

Burning Witches

... è il num perfetg per la band da tschintg damas balurdas ch’èn fieu e flomma per il heavy metal. Ellas èn las mataduras localas – ellas èn domiciliadas a Brugg. Ed a chaschun dal “8x15”. Preschentan ellas chanzuns da l’album nov “Hexenhammer”.

Ikan Hyu

...è in duo feminin da Turitg/Winterthur – in duo cun rollas musicalas na classicas. Ellas sezzas numnan lur stil “pop elastic plastic space power gangster future. E las guardar sin tribuna han ins l’impressiun ch’ellas sunian adina e dapertut insatge auter.

KT Gorique

... mussa sin tribuna la perfecziun e precisiun tecnica. La rappunza da Sion è in multitalent. Na senza raschuns ha ella survegnì il surnum “couteau suisse”, il cunti svizzer. In talent svizzer cun ragischs da Abidjan, in bab talian ed ina mamma da la Costa d’Ivur.

Martha’s Laundry

... fan musica per persunas cun ureglias ch’han gugent il sound als onns 80 e 90. Il trio tessinais – els vegnan da Bellinzona e Lugano – creescha gronds orizonts da tuns sferics e fa punts tranter indie-rock e synthie-pop.

Ray Drma

... saja l’act sexual sonorisà, uschia ha radio SRF Virus caracterisà il sound da Ray Drma. Sex forsa na gest, ma en mintga cas erotic cun ina chamischa averta fin giusum, ina vusch enorm chauda ed in sound cun elements da funk, blues e soul.

Steiner & Madlaina

... èn duas giuvnas chantaduras da Turitg ch’han emprendì ad enconuscher ina l’autra sin plazza da scola. Oz preschentani in stil da musica cun facettas anc mai udidas, cun d’ina vart grondas emoziuns, da l’autra dentant er reflexiuns surprendentas.