8x15 dal Palazzo a Cuira

RTR, RSI, RTS e SRF – las quatter unitads linguisticas da la SRG/SSR – organiseschan e preschentan a partir da quest atun communablamain l'ediziun da 8x15. Uschia datti ils 29 da settember per l’emprima giada ina saira da 8x15, organisada da RTR ed RSI.

Sursiglir cuntegn supplementar

Nagin bigliet? Nagin problem

RTR preschenta quest'emna las bands al Radio Rumantsch. Mintga bunura e mintga mezdi ina da las bands. E per part pudais anc gudagnar bigliets per la saira dad «8x15» a Cuira.

Giganto e Mattiu: il rappunz e ses chantadur

Cun spiert e spass e plain plaschair da chantar e sunar mussan ils dus musicists Giganto alias Ivo Orlik e Mattiu Defuns quant vast che lur spectrum da musica è. Cun ina band davostiers sautan ils dus chantadurs dad in stil en l’auter, dal hip hop en il pop ed enavos. Hip pop rumantsch at its best.

Giganto e Mattiu sin Mx3

Nic Gyalson: power-rock cun in flair psichedelic

Nic Gyalson na tuna betg fitg talian. Ma Nic Gyalson è Nicolò Mariani, ed el vegn cun sia band si dal Tessin per sunar a Cuira. Il sound internaziunal fa tutt’onur al Tessin. Novs tuns cun in’atmosfera tut aparti.

Nic Gyalson sin Mx3

The Melodic Eggs: pulschains musicals senza retegnientschas

Quatter giuvens mats da Cuira vulan purtar lur motto sin tribuna: i sto simplamain far spass. E spass n’han per da regla betg mo els sin tribuna, mabain er ils aspectaturs ed auditurs. Spass e plaschair da lur cumparsa nonchalanta, plaschair da far ina nova scuverta musicala. Cun quels ovs musicals èsi segir anc da far quint ils proxims onns.

The Melodic Eggs sin Facebook

Bumblebees: ils tavauns che impollineschan e fructifitgeschan lur fans

Ils Bumblebees (tavauns) èn sgulads sur il Gottard per ir a star a Turitg. Ed els vulessan impollinar betg mo ils Turitgais cun lur musica, mabain nagut pli pauc che l’entir mund. A Cuira vegn questa missiun a cuntinuar. Quai cun in sound che sgola dals onns 70 vi en il mund dad oz.

The Bumblebees sin Mx3

Pascal Gamboni: il chantautur ch’è er in rocker

Cun ses scharm bunamain arcaic e tipic muntagnard fascinescha el adina puspè ses public. Naginas firlefanzas – nagut auter che musica. Ma ins senta ch’el ha gia sunà e chantà sin las grondas tribunas da quest mund: al festival da jazz a Montreux, a New York, a Londra, a Vienna ed a Bristol. Lo-Fi sin in nivel fitg aut.

Pascal Gamboni sin Mx3

Bell Baronets: bels baruns cun in flair per la musica retro

Il zercladur ha SRF3 declerà els sco «Best Talent». Ina scuverta per propi. Ils rockers da Zofingen en il chantun Argovia persvadan tant sin tribuna sco er cun lur album «The strong one». In bel groove cun ina ghitarra che lascha reviver ils gronds onns da la musica da rock. Ed ina vusch da mai murir.

Bell Baronets sin Mx3

The Broots: strange reggae e dirty beats da Losanna

En l’ediziun 8x15 da Cuira represchentan els la Svizra franzosa. Lur musica ans trai trasora vi e nà tranter l’atmosfera ligera en in café da Jamaica e la chalur d’ina bar urbana entamez ina citad europeica. Garmadi, dir, explosiv.

The Broots sin Mx3

Hedgehog – Pop Rap dal Grischun

El è il matador local. Oriund da Seewis en Partenz ha Sandro Gansner ils ultims onns fatg il pass decisiv en la scena da Pop Rap en Svizra. E dapi che SRF3 ha nominà el sco «Best Talent» ha sia carriera fatg in sigl enorm. Ses Pop Rap ubain Hip Pop derasa immediat in sentiment d’allegria.

Hedgehog sin Mx3

Emissiuns tar quest artitgel