Siglir tar il cuntegn

Header

cuntegn

Eurovision Song Contest Eurovision Song Contest 2017: Nus tschertgain la chanzun svizra

Radio e Televisiun Svizra tschertga ensemen cun RTR, RTS e RSI la participanta u il participant che represchenta la Svizra al Eurovision Song Contest il matg 2017 en l'Ucraina. Musicistas e musicists interessads èn envidads d'inoltrar lur chanzuns a partir dals 26 da settember 2016.

Inoltrar las chanzuns e decisiun da la giuria

A partir dals 26 da settember èn las musicistas ed ils musicists envidads d'inoltrar lur chanzuns via il formular d'annunzia online. Suenter il termin d'annunzia, ils 24 d'october 2016, valitescha ina giuria da 20 commembers las chanzuns che n'èn betg enconuschentas al public. Tut en tut vegnan eruids var 20 candidats per tut las regiuns linguisticas (RTR, SRF, RSI, RTS). Quels èn qualifitgads per la proxima runda e pon sa preschentar al livecheck. La giuria sa cumpona d'experts da musica: producents, persunas da l'industria da musica, musicists e schurnalists. Ils nums vegnan communitgads ordavant.

Durant la segunda fasa, il livecheck, vegnan preschentadas las chanzuns che la giuria ha valità sco las meglras. Ils interprets ston cumprovar a la giuria lur cumpetenza en situaziuns live, la qualitad dal chant sco era la preschientscha sin tribuna. Las chanzuns che vegnan valitadas na vegnan betg publitgadas. Las sis fin diesch contribuziuns che survegnan las meglras notas sa qualifitgeschan per la participaziun a l'emissiun directa naziunala dals 5 da favrer 2017 a Turitg. A la fin decidan sulettamain ils aspectaturs via voting per telefon tgi che duai represchentar la Svizra il 2017 al Eurovision Song Contest en l'Ucraina.

Ina survista da las modificaziuns las pli impurtantas dal process da selecziun:

  • Da nov valitescha ina giuria da var 20 commembers las chanzuns inoltradas. La plattafurma n'è betg pli accessibla publicamain.
  • I na dat nagina regulaziun da quotas per las regiuns linguisticas pli. Da nov na gioghi nagina rolla or da tge part dal pajais ch'ina chanzun vegn inoltrada.
  • La giuria sa cumpona d'experts da musica: producents, persunas da l'industria da musica, musicists e schurnalists. Ils nums vegnan communitgads ordavant.
  • Las candidaturas ston avair ina relaziun cun la Svizra. L'interpret, il cumponist u il textader (almain ina persuna) sto posseder in pass svizzer u viver en Svizra.
  • Ils interprets da las 20 chanzuns che vegnan valitadas sco las meglras preschentan quellas a la giuria al livecheck dals 4 da december 2016. Las chanzuns na vegnan betg publitgadas. La giuria tscherna sis fin diesch acts. Ils commembers da la giuria vegnan communitgads ordavant.
  • Quests sis fin diesch interprets/gruppas sa preschentan ils 5 da favrer 2017 a chaschun da l'emissiun en directa sin SRF dus. Via voting per telefon decidan sulettamain ils aspectaturs tgi che duai represchentar la Svizra al ESC 2017.

Infurmaziuns

Il project Eurovision Song Contest 2017 realiseschan RTR, SRF, RTS ed RSI communablamain. Ils detagls davart las determinaziuns da l'annunzia e la selecziun figureschan en il reglament.

Avais Vus dumondas u impuls en connex cun la selecziun? Contactai nus.

Artitgels legids il pli savens