Siglir tar il cuntegn

Header

cuntegn

Eurovision Song Contest In Rumantsch a la preselecziun svizra da l'ESC 2017

Suenter ils Furbaz l'onn 1989 pudess puspè in rumantsch represchentar la Svizra a l'Eurovision Song Contest. Gino Carigiet da Siat fa part a la furmaziun internaziunala Timebelle che sa participescha a la preselecziun svizra per l'ESC 2017.

Ils blers musicists da la band Timebelle han studegià musica a Berna. Els derivan da la Germania, da la Serbia, da la Rumenia e da l’Ungaria, la chantadura è da la Moldavia. Era il Rumantsch Gino Carigiet studegia chant da jazz a Berna, ed uschia è el vegnì dumandà dal manager da la band sch’el chantass en il chor da Timebelle.

In engaschament per ina chanzun

Gino Carigiet accumpogna la band sulettamain per il project per l’ESC. Ed el chanta cun Timebelle sulet la chanzun 'Apollo', uschia sa numna la contribuziun da la band bernaisa per l’ESC 2017.

La chanzun haja ina buna dramaturgia ed ina melodia che giaja spert en l’ureglia. Plinavant haja ella bler power e la band possia procurar per ina buna atmosfera. El vulessi nizzegiar ils contacts novs e rimnar ina massa experientschas durant il temp cun Timebelle, ha ditg Gino Carigiet.

Atgnamain n'è l’ESC nagut per Gino Carigiet

L’Eurovision Song Contest n’ha betg ina buna reputaziun tar musicists da professiun, declera il giuven da 24 onns. La musica stoppia plaschair ad in vast public, ed uschia n'haja musica in pau pli speziala nagina schanza da success a la pli gronda concurrenza da musica internaziunala. Perquai na saja el era maina vegnì sin l’idea da sa participar sez a questa concurrenza, e quai malgrà ch’el ha actualmain duas furmaziuns.

RR actualitad 07:00

Artitgels legids il pli savens