Il bogn da la Terma da Val è stà plain. Var 300 persunas èn vegnidas – e quai da l'entira Svizra. Il public è stà maschadà era areguard la vegliadetgna: Giuven e vegl èn vegnids a Val per tadlar e guardar, co l'experiment tuna. L'experiment d'unifitgar musica classica contemporana e musica electronica. Las spetgas èn stadas positivas, era sche nagin na pudeva s'imaginar, co i tunia.
Inqual irritaziun musicala ma en general resuns positivs
Ils blers han er laschà plaschair l'experiment sco tal, er sche la musica n'ha betg tutgà tras a tras il gust da mintgin. Cunzunt las passaschas improvisadas, discharmonicas han procurà per inqual irritaziun.
Il cumponist n'ha betg pudì accumpagnar la finiziun da si'ovra
Sulet dagut amar è stà ch'il cumponist e manader artistic dal project David Sontòn Caflisch n'ha betg pudì esser preschent, perquai ch'el è malsaun. En l'arranschament maina il cumponist rumantsch David Sontòn Caflisch cun differents intermezzos tras 5 chanzuns rumantschas tradiziunalas. Per la part classica ha l'ensemble ad hoc Viola procurà. La part electronica ha il giuven artist da musica electronica Lukas Schnider alias Cella contribuì. Il projectè stà part d'ina seria da projects da l'entira SRG SSR «Purple Nights».
RTR livestream 21:00