Siglir tar il cuntegn
cuntegn

RTR Purple Nights Sara-Bigna Janett è averta per experiments

Da chasa è ella plitost sin las tribunas d'opera, en la musica classica e tradiziunala. Ma la giuvna sopranista è fitg averta per cumbinaziuns spezialas sco al concert da RTR Purple Nights en la terma da Val.

la sopranista Sara-Bigna Janett durant l'emprova generala en la terma da Val
Legenda: La sopranista Sara-Bigna Janett è averta per experiments musicals sco quel en la terma da Val. RTR, Flavio Tuor

Fin uss ha la giuvna da 28 onns be fatg in experiment cun musica electronica, numnadamain laschà registrar differentas silbas da sia vusch ch'in pianist ha lura sunà ed ella ha chanta latiers, pia chantà cun ina versiun electronica da sasezza per uschè dir. Ma ella vesa grond potenzial en las pussaivladads da cumbinar sco al concert da Purple Nights nua che musica classica s'unescha cun musica electronica.

Quai è absolutamain in avegnir per la musica classica che tatga per il mument in pau vi da vegls sistems e veglias valurs...
Autur: Sara-Bigna Janettsopranista

La giuvna engiadinaisa n'ha gì nagins dubis da sa participar a l'experiment perquai che sias parts sa basan sin chanzuns rumantschas e quellas giaschian ad ella. Plinavant emprovia ella dad esser en general averta ed empruvar or. Ella na possia anc betg dir gia uss tge ch'ella veglia far e tge segir betg. Sco artista ha ella er il sentiment ch'ins cuntanschia bler dapli aspectaturs sch'ins na sa movia betg mo e ses agen sistem.

Respect da las cameras e microfons

La terma sco lieu da concert cun sia acustica speziala na fa nagins quitads a la giuvna chantadura, anzi ella sa legra fitg sin l'experientscha da chantar tranter las paraids da crap. Respect ha ella però da la registraziun cun cameras e microfons. Lura haja ella ma er l'entir public la pussaivladad dad ir a guardar adina puspè er passaschas che na sajan forsa betg stadas perfectas. Tar in concert live senza registraziun dettia quai bain er en egl al public ma suenter saja quai passà ed emblidà.

RR actualitad 08:00