Stephan Eicher - il Grandseigneur dal chanson
L’onn passa ha el survegnì in Swiss Music Award per sia ovra da vita, ed el ha festivà ses 60avel. Ed uss vegn el onurà cun il Grond premi da musica svizzer 2021, dotà cun 100'000 francs. Ils premis vegnan surdads ils 17 da settember en il center da cultura LAC a Lugano en preschientscha dal cusseglier federal Alain Berset.
Neue Deutsche Welle e l’amur per il chanson franzos
Stephan Eicher è naschì ils 17 d’avust dal 1960 a Münchenbuchsee e cun 21 onns ha el gì ses emprims success cun la band «Grauzone», quella giada cun musica en il stil da la «Neue Deutsche Welle». Ils success impurtants ha Eicher però gì mez dals onns 80 cun sias chanzuns per franzos ed englais e cun ils discs «I tell this night» e «Silence». Lura èn suandads albums fantastics sco «Engelberg» il 1991, «Carcassonne» il 1993, «1000 Vies» il 1996 e «Louanges» il 1999, e quels han er gì grond success commercial, surtut er en Frantscha. Là è Stephan Eicher savens sin ils gronds palcs, er en il Olympia a Paris.
Collavuraziun cun Philippe Djian
Bleras da sias chanzuns derivan da la collavuraziun cun il poet franzos Philippe Djian. El ha scrit ils texts per semperverds sco «Pas d’ami (comme toi)» e «Déjeuner en paix». In auter che ha furnì texts per sias chanzuns è il scriptur svizzer Martin Suter.
Il film «Unerhört jenisch» dal 2017: Eicher e sias colliaziuns cun ils viagiants
Stefan Eicher, il chantautur e rockadur renumà, va er en tschertga da sias ragischs. El vegn uschia er en il Grischun tar las famiglias Moser, Waser e Kollegger, famiglias da viagiants ch'èn sa domiciliadas a Vaz e che han ina gronda colliaziun cun la musica populara.
Stephan Eicher, chansonnier da renum internaziunal
Alexandre Babel, innovatur senza cunfins
Chiara Banchini, spezialista da baroc da renum mundial
Yilian Cañizares, musicista cosmopolita
Viviane Chassot, ambassadura dal accordeon
Tom Gabriel Fischer, piunier da la musica da metal
Jürg Frey, champiun dals tuns loms
Lionel Friedli, battarist cun visiuns
Louis Jucker, dapertut e creativ
Christine Lauterburg, jodladra traglischanta
Roland Moser, alchemist e poet
Roli Mosimann, producent da musica cun udida absoluta da rock
Conrad Steinmann, archeolog da tuns che suna la flauta
Manuel Troller, innovatur da la ghitarra electrica
Nils Wogram, posaunist da jazz cun groove
Il Premi da musica svizzer vegn surdà mintg'onn da l'Uffizi federal da cultura ed è dotà cun 25'000 francs, il Premi grond cun 100'000 francs.