La mamma da Rico Peterelli, Alice, era ina chantadura da num e pum. Ses figl Rico sa regorda fitg bain co ch'el ha tadlà tiers ad ella cu ella excercitava arias a chasa ed el ha lura empruvà da chantar suenter. Uschia è naschì baud il siemi da sez daventar chantadur. La mamma Alice è s'engaschada fitg per il chant a Savognin ed il Surses.
Tatta Alice: tradiziun da musica a Schaffusa
Alice Peterelli era oriunda da Schaffusa ord ina famiglia ordvart musicala. Il bab sunava clarinetta e dus frars violina e cello. Far musica en famiglia era tradiziun ed Alice è gia passada si sco mattatscha ed ha chantà solo. Suenter il conservatori a Turitg ha ella era gì instrucziun da direger tar Hans Lavater ed è daventada ina solista renconuschida a Schaffusa e conturn.
Las vacanzas ha Alice passentà savens a Savognin nua ch'ella ha emprendì d'enconuscher Remi Peterelli. Sco mamma e dunna ha Alice stuì desister d'ina carriera da solista. Ma il chant è restà a cor a la dunna ch'ha emprendì da discurrer surmiran. Ella ha fundà il 1945 la scola da chant ed il 1954 il chor da dunnas «Las Vouschs dalla Gelgia» ch'è daventà dus onns pli tard in chor maschadà. En quest chor han er chantà ses quatter figls e pli tard lura er las figlias da Rico.
Figl Rico
Suenter la scola populara ha Rico Peterelli fatg il seminari da scolasts a Cuira e dal 1962 fin il 1970 ha el dà scola a Casti. Sper la professiun da scolast ha el studegià chant e musica a l'Academia da musica a Turitg. Il 1972 ha el fatg il diplom per musica da scola e pli tard lura il diplom per chant solistic.
Ord l'archiv – Rico Peterelli chanta
Rico Peterelli è stà magister da musica al seminari da mussadras da scoletta a Cuira. A Cuira è el sa chasà cun sia famiglia, la dunna Madlaina e las duas figlias Alexandra ed Andrea.
Talent e gust da musica en tgina
Las biadias dad Alice Peterelli, Andrea ed Alexandra han er survegnì en tgina il gust dal chant, han frequentà la scola da chant a Cuira e pli tard lura er chantà en il chor fundà da lur tatta Alice. Andrea instruescha musica e ritmica als uffants da scoletta ed en emprima e segunda classa primara e la sora giuvna Alexandra è magistra da chant a la Scol'auta da pedagogia a Cuira.
Las Vouschs dalla Gelgia
Quasi l'entira famiglia Peterelli (la mamma, Rico e ses trais frars e pli tard er las figlias da Rico) ha chantà en quest chor. Il 2004 han els dà in concert da giubileum (50 onns) a Savognin. Ed il chant accumpogna anc adina la famiglia Peterelli.
Dapi il 2009 diregia Rico il chor da seniors Canziano, er cun grond agid da la figlia Alexandra. La figlia Andrea instruescha musica e ritmica als uffants pitschens fin la segunda classa primara e dat magari er curs da musica e chant per senioras e seniors. Rico Peterelli cumpona ed arranschescha er chanzuns per il chor da seniors nua ch'el chanta er regularmain passaschas da solo. Canziano è in «project» dal cor da Rico Peterelli.
