Ils 25 da december 1965 è naschì Alvin Muoth sco giuven da trais frars dals geniturs Sep Antoni Muoth (oriund da Breil) e sia mamma Seppa (nata Spescha, oriunda da Pigniu). Els han bajegià chasa a Razén ed Alvin è creschì si en in ravugl da famiglia fitg musical e tradiziunal. A Razén ha Alvin er fatg las scolas popularas. El ha lura cumenzà il gimnasi a Cuira, tranter auter er dus onns seminari da magisters. L'amur per la musica era dentant memia gronda ed el è sa decidì da studegiar musica.
Temp da studi
Cun 18 onns ha el cumenzà ses studi da musica en l'Austria, a Feldkirch en il Vorarlberg, in temp a Vienna e pli tard er al Mozarteum a Salzburg. Tranteren hai er dà intginas staziuns da studi en l'Italia e la Germania. En Svizra ha el fatg sco tut ils umens giuvens la recruta, ed el ha manà vinavant la tradiziun da musicists militars en famiglia. Sco el ha ditg, eran ses bab e ses dus frars Amadeus e Ciril medemamain en la musica militara. Gia cura ch'el ha fatg la recruta era Alvin Muoth in candidat valabel per daventar adjutant ed instructer. L'inspectur da las musicas militaras da lura, Albert Benz, aveva dumandà el sch'el vegli far quai ed era ses conturn ha manegià ch'i fiss da far. La finala haja el sa laschar persvader da surpigliar il post e daventar successur da l'instructer Werner Strassmann.
Musica militara
Il 1991 ha el fatg la scola d'instructer da musica militara ed è uschia daventà l'emprim adjutant rumantsch. La lavur cun giuvens recruts ha plaschì ad Alvin Muoth, la vart militara ha dentant fatg gronds fastidis e la finala è el sa decidì il 1994 da bandunar puspè quest post en l'armada svizra.
El ha dentant fin la fin da ses servetsch militar dirigì la musica dal regiment 36. Il 1994 è el turnà en la vita civila sco dirigent e chantadur ma er magari sco posaunist. Il 1993 ha el maridà e paucs onns pli tard er fundà famiglia. Ses domicil ha el mess a Küssnacht am Rigi nua ch'el ha tranter auter dirigì il chor viril.
Alvin Muoth en emissiuns dad RTR:
