Ils musicists han prendì d'enconuscher in l'auter durant il temp da studi a l'universitad da musica Vienna. En il cafè «Mnozil», in'ustaria en l'emprim district da Vienna, èn els s'inscuntrads regularmain ed han cumenzà a magari sunar libramain e tut spontan. Els han divertì la glieud, ed il 1992 è sa sviluppada ord quests inscunters spontans da musicists ina furmaziun da musica da renum mundial.
Ils commembers
Dapi lur fundaziun è la furmaziun restada pli u main en la medema constellaziun. I ha dà sulet duas midadas, ina tar las trumbettas, Wolfgang Sohm ed ina tar las posaunas, Sebastian Fuchsberger. Omadus han chalà l'onn 2004. Dapi lura n'hai dà naginas midadas pli e la furmaziun ha actualmain ils suandants commembers:
Trumbetta, trumba e chant:
Thomas Gansch, Robert Rother e Roman Rindberger (dapi il 2004)
Posauna e chant:
Gerhard Füssl e Zoltán Kiss (dapi il 2005)
Posauna, basstrumbetta e chant:
Leonhard Paul
Tuba e chant:
Wilfried Brandstötter
Tuts dad els han sper lur qualitads musicalas er talent cumediantic. Els èn adina spontans e giaudan er durant in concert da disturbar lur conmusicants sin tribuna ed emprovan da far vegnir els or dal concept. Quai dat magari legras, fitg legras scenas e situaziuns sin tribuna – ed è in gaudi per il publicum. Il recept da lur cabaret musical funcziuna gia dapi 30 onns. Il 2006 han els pudì retschaiver il «Salzburger Stier» per lur prestaziun, e quest onn dattan els in concert al «Humorfestival Arosa».
Da la furmaziun datti er plirs discs cumpacts. Ils emprims onns han els fatg registraziuns en studios, per exempel «Volksmusik aus Österreich: No Ziel» (1996) u «Wenn der Kaiser grooved» (1998). Lura han els però cumenzà a prender registraziuns live da lur concerts (p.ex. «YES, YES, YES» dal 2015 u «Smoke live» dal 2002). Quai è propi lur stil, sunar, far legher e divertir il publicum sin aut nivel.
Mnozil en la televisiun
Gia per il giubileum da 20 onns hai dà in film, ed er per lur 30avel ha l'emettur Servus TV mussà in purtret da la furmaziun. Er en quel sa mussan ils commembers da lur vart legra, cumediantica. Tar els na san ins mai sch'els manegian serius quai ch'els din u sch'era quai èn be sgnoccas. En scadin cas in film fitg divertent.
Era numerus videos da Mnozil datti sin youtube.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.