Siglir tar il cuntegn

Header

audio
Edward Grieg: Suns e tuns norvegiais
Or da La classica dals 17.01.2021.
laschar ir. Durada: 01:00:01 minutas.
cuntegn

Edward Grieg Suns e tuns norvegiais

I na dat betg blers cumponists da musica classica da la Norvegia. Il pli enconuschent è Edward Grieg (1843-1907). Quest cumponist tutga tar la scola naziunala da la Norvegia. Da quest temp han ils cumponists da musica classica scuvert la musica populara ed integrà quella en lur ovras d’art.

Il cumponist norvegiais ha cunzunt fatg quai en sias cumposiziuns liricas per clavazin, nua ch’el sa basa sin chanzuns e sauts da la Norvegia. I sa tracta da miniaturas plain allusiuns sin la tradiziun. Trais da quellas pudais Vus tadlar en quell’ura.

Adina n’ha tracta sia musica però betg da la Norvegia. Uschia na descriva sia levada dal sulegl enconuschenta sut il titel «Morgenstimmung» betg sco ils emprims radis stgaudan las spundas grippusas enturn ils fiords en il Nord, mabain ina levada dal sulegl en la Sahara. La musica per quest’ovra ha el numnadamain cumponì per il drama Peer Gynt. – Vers la fin da l’emissiun suondan ulteriurs moviments ord la suita Peer Gynt.

Concert da success

En il center da l’emissiun stat ses concert per clavazin ed orchester en a-moll, opus 16. Igl è sia suletta ovra ch’el ha scrit en quest gener. Vid quella cumposiziun ha Edward Grieg lavurà cunzunt il 1868, pia en la vegliadetgna da radund 25 onns. Paucs onns pli tard ha Franz Liszt, ch’era in bun ton pli vegl che Grieg e che giudeva renum sco cumponist, sunà quel concert en la preschientscha da Grieg. Liszt saja stà dal tuttafatg intgantà ed ha guess motivà il cumponist giuven:

Fahren Sie fort. Ich sage Ihnen, Sie haben das Zeug dazu. Und, lassen Sie sich nicht abschrecken!
Autur: Franz Liszt

La Classica 19:00

Artitgels legids il pli savens

Scrollar a sanestra Scrollar a dretga