L’onn 1829 ha Mendelssohn fatg in viadi en Scozia. Tranter auter ha el visità las inslas Hebridas. Ses viadi sin il bastiment sto esser stà orribel ed el haja patì ferm dal mal da mar, quai scriva ses accumpagnader. Il resultat musical da quel viadi è l’uvertura da concert «Die Hebriden» op. 26 en h-moll. Cunzunt il ballantschar en perpeten da las undas ha chattà la via en il motiv principal da quel ovra.
La segunda ovra ch’è resultada da ses temp en Scozia è la sinfonia nr. 3. En ina brev raquinta Mendelssohn ch’el ha visità la saira il palaz nua che Maria Stuart aveva vivì bunamain trais tschientaners avant. Quel palaz e cunzunt la chaplutta dasperas ston avair captivà il cumponist:
Cura ch’i fascheva brin essan nus ids tar il palaz, nua che regina Maria Stuart ha vivì. [...] A la chaplutta daspera manca il tetg, pastg e fegliadella crescha dapertut e al altar rut è Maria Stuart vegnida encurunada. Tut è rut, marsch e sut tschiel avert. Jau crai, ch’jau hai chattà oz là l’entschatta da mia sinfonia da la Scozia.
Anc en Scozia ha Mendelssohn cumenzà cun la cumposiziun. Turnà sin terra franca ha el onns a la lunga betg lavurà vinavant vid quell’ovra. Pir 12 onns pli tard ha el terminà la sinfonia nr. 3 en a-moll.
A la publicitad n’ha Mendelssohn sez mai tradì il connex da quella sinfonia cun la Scozia. Che nus savain oz quai è sulet d’engraziar a sia brev. Tuttina po quell’infurmaziun dar ad audituras ed auditurs inqual punct da referenza.
L’emissiun cun musica classica da differents cumponists ord tut las epocas. Interpretada d’orchesters e solists da renum.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.