La populara dad oz deditgain nus ad Alfred Oswald e ad Urs Glauser, dus musicants enconuschents da la musica populara svizra. Alfred Oswald avess ils 22 da mars 85 onns – Urs Glauser ses 70avel. Tuts dus èn però morts bler memia baud. Dad els datti divers sauts che vegnan sunads da bleras furmaziuns, ed in per da quels tadlain nus en nossa «populara».
Alfred Oswald, è naschì ils 22 mars dal 1938 ed ha passentà sia uffanza a Müstair, pli tard è el stà in temp a Berna – e là ha el cumenzà a cumponer. El turna lura en Grischun, a Samedan, e lavura sco capo tren tar la Viafier retica. Sia gronda passiun era però la musica. El è stà engaschà en la musica populara, tar chors e la musica instrumentala – è stà dirigent da las musicas da Müstair, S-chanf, Susch e Zuoz – ed ha dirigì chors a Samedan e Puntraschigna.
Perquai datti dad el er cumposiziuns da musica populara, instrumentala e per chor, profan e sacral e schizunt duas messas. Ina schelta da sias ovras datti sin il disc «La perla zoppada» cumparì il 2011, 20 onns suenter sia mort – ils 21 da settember dal 1991. Alfred Oswald mora cun be 53 onns en ses lieu preferi sin l’Alp Sielva.
Urs Glauser è naschì ils 18 da mars dal 1953 a Jegenstorf ed avess ussa 70. Er el mora memia baud, il 2004, cun 51 onns. A la fin ha el vivì en Grischun e qua ha el er fatg musica. El è stà musicant e cumponist plain schlantsch, cun sunar l’orgelet en pliras furmaziuns – uschia er cun Peter Zinsli – ed er sco cumponist. Dad el datti passa 50 sauts che vegnan sunads da bleras chapellas.
La musica populara dal Grischun e da la Svizra chatta ses lieu en questa emissiun.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.