In dals inscunters impurtants da la musica populara è la «Stubete am See» ch'è mintg’onn la fin d’avust a Turitg. Da quest eveniment datti er ina varianta muntagnarda: Dals 21 als 23 d’october è er a Segl en Engiadina ina Stubete am See cun blera musica populara, da sauts tradiziunals ed innovativs fin tar tuns enconuschents e surprendents. Las furmaziuns vegnan da l'entira Svizra e preschentan lur musica cun gronda variaziun e cun blers instruments, dal orgelet al cello, da la tiba al arpet e da la ghitarra al cuntrabass.
Il program da quests trais dis cuntegna 26 concerts sin palcs en hotels, en la baselgia averta ed en la chasa da scola Champsegl.
Las chapellas e furmaziuns
Sin ils differents palcs datti musica dals Engadiner Ländlerfründa, dals fragliuns Küng dal chantun Appenzell, Ambäck, Schäbyschigg, la chapella Bodaguat, e da Balthasar Streiff cun tibas e corns. Ina premiera preschentan ils Fränzlis da Tschlin cun lur ovra «Der Schatz im Silsersee» – ed a Luzi Bergamin (1901-1988), in dals musicants e cumponists impurtants da la musica populara grischuna, vegn regorda cun il project «Luzi-Musig».
La musica populara dal Grischun e da la Svizra chatta ses lieu en questa emissiun.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.