Oz datti ina populara deditgada ad in giubilar, in musicant da vaglia, cumponist ed arranschader dal chantun Basilea pajais. Quai è Urs Mangold, manader da la «Oberbaselbieter Ländlerkapelle» e multiinstrumentalist. El è naschì il 1954 a Rünenberg en il chantun Basilea pajais, è stà magister ed è musicant e cumponist. Gia cun 8 onns ha el cumenzà cun la scola da musica e suenter, durant la scolaziun da magister e magister da musica, è el daventà multiinstrumentalist. El suna clarinetta, la flauta, orgelet, ghitarra, clavazin e cuntrabass, ed il 1971 ha el fundà a Sissach la «Oberbaselbieter Ländlerkapelle». Il 1999 ha el survegnì la clav da violina d’or – e sonda proxima ha el ses 70avel. Perquai datti oz ina populara cun in per da sias sur 100 cumposiziuns e sias furmaziuns. Da sia furmaziun principala, la «Oberbaselbieter Ländlerkapelle», da la «Sissecher Holzmusig» però er d’autras chapellas che interpreteschan ses sauts.
