Normalmain registreschan ins chanzuns d'amur e spera che quellas vegnan forsa ina giada sunadas tar nozzas. Tar «Für immer» è quai stà exact il cuntrari.
Chantadur e producent Sandro Dietrich aveva numnadamain scrit la chanzun «Für immer» per las nozzas da sia sora. Mo tgi èn quels dus schanis per propi?
Nyna Dubois
Nyna Dubois ha cumenzà sco chantadura da background per artists sco dr Duke, Gimma e Sandee. Ella ha dentant er spert gì success cun in project da solo. Ella è sa muventada en ils geners da R&B, soul e hip hop, dentant er en la musica da pop e jazz.
Sias ragischs schain per propi en la musica classica. Sco giuvna da 16 onns è ella sa participada a la concurrenza da musica da giuvenils cun in'aria da Haydn, accumpagnada da l'orchester da chombra dal Grischun. Uss abitescha ella a Berna e lavura là en ina scola da musica.
Sandro Dietrich
Quest atun ha Sandro Dietrich fatg lingias grossas cun gudagnar ina platta d'aur. Quella n'ha el betg gudagnà sco chantadur mabain sco producent da la chanzun «Adiòs» da Loco Escrito.
Dentant ha il giuven da Domat era gia gì success sco chantadur. Il 2007 è el sa participà a l'emissiun MusicStar nua ch'el ha cuntanschì il settavel plaz. L'onn passà ha el gudagnà cun «Bluamamaitli» il premi per la chanzun grischuna da l'onn 2017.
Il medem onn ha el fundà ensemen cun Lou Zarra e Stefan Schmid il studio da tun Klangstark.
Project communabel
Entras Gimma èn Nyna e Sandro vegnids ensemen. Omadus avevan da lavurar cun il rapper da Cuira. La chanzun «Für immer» dals dus artists grischuns è naschida per las nozzas da la sora da Sandro.
RR Famus e glorius 10:30