«Land Ho» è il 14avel disc da la band da Basilea enturn il chantadur Adrian Sieber. Ils emprims pass han els fatg sco furmaziun giuvna il 1993...ed els han accumpagnà ina generaziun intera cun lur hits sco «Bitter Moon», «Angel Heart» e «Under my Skin». Il success è sta pel solit da lur vart, els èn stads savens davantvart en la parada svizra, han schizunt blers fans en auters pajais, e tar festivals eran els adina giasts bainvesids.
Il 2012 han els fatg lur ultim disc «LIFE IS TODAY»
Dapi là esi stà plitost quiet. Els avevan fundà famiglia e la musica n’aveva betg adina pli la pli gronda prioritad. Pero disparir dal palc e smetter da far musica: impussibel per els.
Il disc nov «Land Ho»
Cun lur disc nov «Land Ho» ch’els han registra l’emprim a Berlin mussan els danovamain lur qualitads da scriver chanzuns. In disc cun tuns frestgs e cun melodias che van spert en l’ureglia.