Siglir tar il cuntegn

Header

Navigaziun

cuntegn

Live tar RTR A Breeze of Emotions – il nov disc da Marie Louise Werth

La carriera da la musicista renumada ha cumenzà avant 30 onns cun ils Furbaz. Gia ils onns 90 ha Marie Louise Werth er fatg sia atgna carriera sco musicista e chantadura. E dacurt ha ella uss puspè publitgà in nov disc cun chanzuns levas e lomas, cun clavazin e ghitarra.

ina dunna che chanta
Legenda: ina chantadura cun gronda expressiun. MAD

Marie Louise Werth ha cumenzà sia carriera da musicista cun ils Furbaz, e quella furmaziun ha gì grond success – betg sulet en terra rumantscha. Els han participà il 1989 a l'Euorvison Song Contest e cun «Viver senza tei» han els cuntanschì il 13avel plaz. Lur semperverds da quels onns èn: «Da cumpignia», «La canzun», «Sentiments» e bleras autras. Durant ils onns 90 èsi stà pli calm e lura ha Marie Louise Werth fatg si’atgna carriera da musicista e chantadura. A partir dal 2004 han els lura puspè fatg musica, surtut cun lur concerts da Nadal, enconuschents en tut la Svizra.

B

ils Furbaz sin il palc
Legenda: ils Furbaz MAD

La chantadura Marie Louise Werth e ses disc nov

Er durant quels onns ha Marie Louise Werth cuntinuà a far musica ed er a viver per e da la musica. Uss viva ella en il chantun Sursilvania, po guardar enavos sin ina carriera da sur 30 onns e vala sco ina da las musicistas da renum en Svizra. Gist cumparì è ses disc «A Breeze of Emotions» cun chanzuns e balladas per englais e per rumantsch. Ella sa preschenta ina giada be suletta cun clavazin, lura cun band, cun tuns da ghitarra, adina lev e mintgatant er cun in pau swing. En il center stat sia vusch e cun quella exprima ella sentiments melancolics e romantics.

ina chantadura
Legenda: en ses element: sin il palc MAD

La turnea da Nadal

Quest onn va Marie Louise Werth sin turnea cun in program da Nadal, e cun quel fa ella fermativa en pliras citads svizras ed ils 20 da december er a Cuira.

RR Famus e glorius 10:30