«Chiara», quai è Chiara Jacomet da Rabius. La giuvna da 18 onns è il chau da la gruppa. Gia sco uffant era la musica sia passiun. E sia passiun è ussa era tema principal da ses project da scola:
Crear in'atgna EP
Nagina single, era betg in album, mabain ina EP. Quai è il resultat da la lavur da Chiara Jacomet. Per pudair realisar quest project, ha ella radunà insaquantas collegas e fundà la gruppa «Chiara». Lu ha ella scrit e cumponì sezza tut las chanzuns. Reclama e finanziaziun ha ella era gist prendì en ils agens mauns. Per rimnar daners per sia EP ha Chiara nizzegià tranter auter crowdfunding. Ed entaifer paucs mais han 45 persunas sustegnì la giuvna artista per realisar l'atgna EP che cuntegna sis chanzuns.
Primaudiziuns da «Mascra» e «Audas»
Chiara en la rait
Duas chanzuns giud la EP han gì primaudiziun tar RTR: «Mascras» e «Audas». Mascra è gest l'emprima single giu da l'EP e va davent dad uss en il program quotidian da RTR. «Mascra», in num che stess bain a tut ils titels, di Chiara Jacomet sezza. Blers carstgauns na sajan betg adina sasez, sa zuppian davos ina mascra. Saja quai sfurzadamain u libramain. Quai manegia Chiara dentant betg mo sco critica, mabain era sco cussegl, e vul far attent ch'ins n'è betg sulet cun quels sentiments.
«Audas» ha Chiara sunà live en il radio. Ina chanzun che va en ina sumeglianta direcziun sco «Mascra». Era qua vul la giuvna chantautura far attent ch'ins n'è betg sulet cun tscherts sentiments. Tar «Audas» tematisescha ella dentant il sentiment da l'esser bandunà, ch'ins patescha e nagin s'accorscha. E tschenta dumondas sco: Tge è lubi? E tgi lubescha quai insumma? Pia chanzuns che laschan e fan pensar e reflectar, e tractan problems che pon pertutgar in e scadin.
Il disc vegn battegià
Sonda ils 16 da settember preschenta Chiara ensemen cun sia gruppa da giuvnas sias chanzuns, e battegia l'EP «Mascra». Ina gruppa che vegn en mintga cas a derasar ina speziala atmosfera en il Cinema Sil Plaz a Glion.
RR actualitad 11:00