Carmen Cresta quai n'è betg il nov mascottin per il lai tranter Trin e Flem, mabain il num da la chantadura da la gruppa cun il medem num. Sper Carmen sunan en quella band er Valentin Alig da Sursaissa e Silvio Riedi da Laax. Carmen ha 27 onns ed è creschida si en Val d'Alvra. Durant ses emprendissadi a Zernez sco assistenta da pratica da medi ha ella emprendì vallader. Perquai chattan ins era trais chanzuns per rumantsch sin ses album da debut «Aurora».
«Aurora» tadlà atras
En «Hamsterrad» dechanta Carmen Cresta il sentiment d'esser piglià en la rutina dal mintgadi. Ord quella rutina ed il frust che sa resulta ord quella vul ella rumper ora en la chanzun «Animal». Quai è lu era il fil cotschen che sa trai tras l'entir album da debut. Uschia è l'album «Aurora» da la tematica nà fitg damanaivel a l'auditur. Er la decleraziun d'amur a sia partenaria «So wia du bisch» tutga il cor ed ins po resentir ses sentiments.
Da las diesch chanzuns da l'album èn trais e mez rumantschas. La chanzun mez rumantscha è «Witer», ina collavuraziun cun il rocker da Sedrun Dario Hess. Las chanzuns da rock sin quest album èn era quellas che funcziunan il meglier. Sper «Witer» han era «Paradox» ed ils dus tocs rumantschs «Privlus» ed «Animal» ina massa schlantsch ed èn adattads per ils rockers tranter nus. Il cunfin tranter il sgarar tschuf dal rock e la nonchalance giugada è dentant stretg. Là è era in pau il problem da l'album «Aurora» – per part manca in pau l'autenticitad. Dentant en il temp da musica electronica, autotune e sumegliant fa quai ina giada bain da puspè udir in simpel, sincer sound fatg a maun cun texts che mintgin po resentir.
RR Musica 09:30