Siglir tar il cuntegn

Header

video
Curdin Nicolay: Dunna Carolina
Or da RTR dals 03.05.2017.
laschar ir. Durada: 1 minuta 50 Secundas.
cuntegn

Live tar RTR Curdin Nicolay fa sautar las furmias

Pli che diesch onns fa Curdin Nicolay gia musica e parta sias istorgias bain raquintadas, accumpagnadas da melodias finas en simpels arranschaments. Diesch onns suenter l’emprima registraziun d’ina single cumpara uss ses emprim disc.

Las chanzuns singularas da Curdin Nicolay muventan cun ina maschaida particulara d'istorgias mirvegliusas, cumposiziuns minimalisticas expressivas ed in sound nunusità. Il nov disc cumpact unescha material existent – sco sia emprima ovra «Kindl», cun la quala il musicist ha immediat sa fatg in num en la musica rumantscha – cun chanzuns novas. En quellas amplifitgescha il musicist e cumponist il maletg sonor nunconvenziunal cun numerus musicists e cun elements electronics.

Istorgias fantastas ord l’atgna vita

Curdin Nicolay è in raquintader talentà. Cun pleds, melodias e tuns percepescha el il particular en l'ordinari, l'usità en il spezial ed il drama davos l'allegria.

Uschia nascha bain inqual idea bizarra che sveglia interess:

  • ses uffant betg anc naschì daventa in «Cosmonaut»
  • il signur da Genevra en «Lat da chavra» na sa atgnamain betg tge ch'el tschertga, ma chatta tuttina quai en l'Engiadina ed en il chaschiel-chaura
  • sin la loipa da passlung amez ils prads alpins na ston ins betg mo quintar cun cuntravent, mabain magari era cun l'atterrament d'in aviun e cun tut il tamtam che tutga vitiers.
  • e da quai che l'aviun porta sto schizunt la vaira amur en «Duonna Carolina» capitular

Las chanzuns da Curdin Nicolay èn istorgias or da sia istorgia, sa movan e storschan enturn chanzuns popularas engiadinaisas, la Viafier retica, muntognas e vals, e l'entir mund tranteren.

In disc – blers chaus

Ensemen cun il producent Manfred Zazzi ha Curdin Nicolay tschernì ina gronda e vasta collavuraziun cun differents musicists. Quai ha procurà per bleras ideas ed ina gronda diversitad sin emprim’ovra da Curdin:

  • Martina Linn ha emprestà a bleras chanzuns sia vusch da background.
  • Rolf Caflisch, Valeria Zangger e Simon Britschgi han procurà per il sound da percussiun.
  • Vid las ghitarras èn d'udir sper Curdin Nicolay Jean Pierre von Dach, Andi Schnoz e perfin Adrian Stern.
  • Lucas Schwarz e Rees Coray han contribuì cun il bass ed il cuntrabass. Ed André Gemassmer (tastas, vusch), Cristina Janett (cello) e Rico Puorger (ghitarra, accordeon) serran giu la runda da chaus.

audio
Curdin Nicolay en il studio dal Radio Rumantsch
ord RTR Audio dals 03.05.2017.
laschar ir. Durada: 17 minutas 54 Secundas.

Nev da Paulin Nuotclà

Ins ha ditg considerà Curdin Nicolay sco «l'ertavel musical» da ses aug Paulin Nuotclà. Ma el è daditg sa mess sin atgnas vias musicalas. Cun sias chanzuns plaschaivlas e subtilas ha el cuntanschì in renum respectabel sco chantadur, autur e cumponist.

Gia sia emprima registraziun en il 2007 «Kindl» è sa fitgada en las ureglias da las audituras e dals auditurs dal Radio Rumantsch. Cun «Nüglia da Nouv» che cumpara 2008 en la retscha dal Top Pop Rumantsch e «Nouva Cità» dal 2011 è sia vusch definitivamain s'etablida tranter las pli enconuschentas da la musica rumantscha.

Da professiun è il musicist scolast primar. Suenter set onns en la Bassa lavura el oz en ses vitg natal da Bever. Ses idiom vallader, exotic per l'Engiadin'Ota, ha el iertà da ses geniturs da l'Engiadina Bassa. Dapi dacurt è Curdin Nicolay sez bab.

RR actualitad 11:00

Artitgels legids il pli savens