Ils dus giuvens Bernais Lorenz Häberli e Luc Oggier fan dapi diesch onns ensemen musica. Sco «Lo & Leduc» publitgeschan els uss lur sisavel album «Update 4.0» e tuttina sco ils emprims Update-albums ès era quel gratuit. Tar «Update 1.0» saja l'album stà gratuit, perquai che la glieud haja pir ina giada stuì scuvrir els. Ma l'album saja naschì plitost ord in schabetg: Lo & Leduc han numnadamain cumenzà lur carriera en l'ensemble «Pacomé» ed han fatg il 2009 lur emprim album. Tar quel èn restads avunda chanzuns per in segund album ch'els han lura publitgà sco duo «Lo & Leduc».
Dus munds cumbinads
Cun l'album «Zucker fürs Volk» dal 2014 èn Lo & Leduc s'etablids definitivamain en ils radios e la parada da hits Svizra. In motiv per quai è segir er che lur musica è daventada pli melodiusa ed adattada per in vast public. Perquai han Lo & Leduc er pudì dar concerts tar blers festivals en Svizra. Là èn per exempel «Jung verdammt», «Blaui Pepperoni» u er «All die Büecher» anc adina tranter las preferidas. Ils Bernais che vegnan accumpagnads d'ina fulla musicists durant quels concerts, han plaschair ed energia sin tribuna. E quai influenzescha er lur public.
Da l'autra vart dattan ils rappers concerts en furmaziun classica e sa participeschan ad events sco il Cypher da SRF Virus – in inscunter da la scena da rap Svizra, nua che pli che 80 rappers cumbattan sur set uras per la meglra «punchline».
Cun «Update 4.0» turnan els puspè tar lur ragischs, però cun texts pli critics ed in sound pli dir. Per Lo è quai album: «betg mulà, liber, senza concept, tschuf ». Ma tuttina è l'album gartegià ed ha il potenzial d'avair success.
