Siglir tar il cuntegn

Header

cuntegn

Live tar RTR Patric Scott: il star zuppà

El è in chantadur ed actur da musical e teater dal qual ins ha fin uss anc udì darar il num. Cumenzà ha tut precis avant 11 onns cun la rolla dal Peter tar «Heidi – Das Musical» sin la «Walenseebühne». Oz è el uschè lunsch ch’el edescha entamez giugar al musical, era gist anc in nov album da solo.

Sch’ins è visitader regular dals musicals sin la «Walenseebühne» a Walenstadt duess il num Patric Scott atgnamain esser conuschent. Pertge el è stà fin uss sin tribuna tar mintga ediziun. Uschia è el quest onn tar «Saturday Night Fever» per la 7avla giada sin il palc dal 7avel musical. El gioga la rolla dal «Bobby C.».

Il cor batta per la musica da pop

Sper la vita sin la gronda tribuna da musical batta il cor da Patric Scott per la musica da pop. Cun sia vusch da soul è el senz’auter gia dà en egl ina u l’autra giada en la scena. Mo per il grond success medial n’ha quai fin uss anc betg tanschì. Quai vul Scott midar cun ses nov album.

E per che quai reusseschia ha el contactà Rose Ann Dimalanta, che suna keyboard tar Seven. Lezza è siglida cun el en la bartga, ha gidà da far ils arranschaments e lura tramess Scott a Los Angeles en in studio da producziun. Là ha ina truppa da musicists da grond renum beneventà el per gidar tar sia missiun. Senza che Patric Scott saveva insatge da quai, han spetgà là gronds musicists da studio ch'han era gia sunà per Jennifer Hudson, Patti LaBelle, Beyoncé u perfin Prince.

audio
«Paint Me Black» è in album da pop cun ina glasura da soul
ord RTR Audio dals 24.08.2017.
laschar ir. Durada: 14 Secundas.
«Paint Me Black» è in album da pop cun ina glasura da soul.
Autur: Patric Scott
Purtret da Patric Scott, dessignà.
Legenda: Il cover da «Paint Me Black». MAD

Nov album «Paint Me Black»

Il resultat da questa lavur a Los Angeles è in album cun bler soul, grondas vuschs e lomas balladas. In album che viva, che ha emoziuns e stgaffescha ina bella e buna atmosfera per l’auditur. Mo era in album che transferescha ins automaticamain entamez in musical. Ins senta che Scott s’identifitgescha ferm cun il mund da Broadway.

Artitgels legids il pli savens