Ils 8 da mars, in di suenter ses 40avel preschenta il musicist dad Interlaken ses quart disc «Patina» cun 12 chanzuns, in disc plain Pop, Soul, Funk e Groove en il stil tipic da Ritschi.
Ils gronds success cun Plüsch
La carriera da Ritschi ha cumenzà avant 20 onns cun sia band «Plüsch». Els han dà nov schlantsch al pop cun text en dialect svizzer ed han fatg concerts tar ils gronds open airs ed en salas plainas. Ed er en la parada da hits svizra han els gì ina gronda preschientscha – ed han collecziunà discs d’aur e platin.
Ritschi vul dapli
Malgrà il success: ils commembers da la band na vulan betg sa concentrar be sin la musica. La consequenza per Ritschi è stada d’instradar ina segunda carriera sco solist.
Er quai fa el cun grond success e ses emprims trais discs èn vegnids sin l’emprima ubain la segunda plazza da la parada svizra. Uss segua «Patina», ed er qua mussa el sias grondas qualitads sco interpret e cumponist. El sa raquintar istorgias dal mintgadi, er sias atgnas – ed el fa quai cun calma e segirezza.
Damain chavels e dapli experientscha
Er sin ses disc nov è Ritschi adina frestg, cun texts che van er pli profund – ed el sa er esser autoironic: «I wot meh viel meh, als es Huus u ne Hund une Gartehaag, I wot bitter salzig süess und suur und Umami» chanta el sin sia emprima single, ed er sias autras chanzuns èn divertentas e d’emprima qualitad.
