25 onns sin il palc
Sina ha registrà 11 albums, ha vendì sur 300'000 portatuns, ha fatg sur 1'000 concerts cun 1,5 milliuns visitadras e visitaders. E dapi 25 onns è ella sin il palc. L’emprim cun musica e vusch rockusa, cun tocs sco «Dr Sohn vum Pfarrär» ubain «Unbeschriiblich wiiblich».
Cun ils onns è ella sa sviluppada, sias cumposiziuns èn idas vi e pli en direcziun pop, chanzuns che raquintan bellas istorgias cun in’atgna expressiun. Sina ha er collavurà savens cun auturs/as sco Sibille Berg e Milena Moser – ed uss er cun Olga Tucek ed Urs Augstburger.
«Emma», il disc nov
Er sin ses disc nov cun 13 chanzuns en stil pop e folk raquinta ella bellas istorgias, er da quellas persunalas sco quella commoventa da sia nona, ella chanta davart amur e relaziuns, prender cumià e da la glina che turmenta. Per la producziun da ses disc ha Sina puspè gì sustegn d’in team cun experientscha: Adrian Stern sco producent, Jean-Pierre von Dach a la ghitarra e Michael Chylewski al bass. Tar ils texts ha ella er puspè survegnì sustegn: questa giada da l'autur Urs Augstburger, da Tinu Heiniger e Christoh Trummer.
Er sin ses disc nov «Emma» datti collavuraziuns, uschia cun Ritschi, Hendrix Ackle, Anna Känzig e Gigi Moto. Ed er sia lavur cun Adrian Stern cuntinuescha. El è stà co-autur tar diversas chanzuns e per l’emprima giada è el er stà producent.
In premi per si'ovra musicala
Ils 16 da favrer, en occasiun dals «Swiss Music Awards», vegn ella onurada cun il premi «Outstanding Achievement Award» per tut quai ch’ella ha fatg per la scena da musica svizra.
Ed ella vegn er stimada d’amias ed amis da la scena da musica. Ils ultims onns ha ella perquai er pudì realisar bleras collavuraziuns cun gronds nums, e da quellas hai dà perlas sco : «Wenn es nötig wär», cun Polo Hofer – «Wa du bisch», cun Marc Sway ed il bellischem «I schwöru», cun Büne Huber.
RR actualitad 11:00