Siglir tar il cuntegn
Inhalt

Live tar RTR Vincent Gross cun Ingeborg tar RTR

Avant in onn ha Vincent Gross dà ses debut cun l'album «Rückenwind». Uss edescha il giuven da Basilea gia ses segund album «Möwengold».

Vincent Gross durant l'intervista tar RTR
Legenda: Il simpatic giuven Vincent Gross raquinta da ses album nov RTR, Dominic Pohle

Punctual tschintg minutas avant il termin Vincent Gross arriva en il studio dad RTR. Curtaschaivel e da buna luna salida el la squadra da RTR e pachetescha lura directamain ora sia Ingeborg. Bain chapì Ingeborg è il num da sia ghitarra e cun lezza suna el gest in dus tocs da ses nov album «Möwengold».

Da Youtube sin las tribunas grondas

Ses emprims experiments musicals ha Vincent Gross fatg cun parter covers registrads en sia chombra d'uffants sin Youtube, il link avra en ina nova fanestra. Quai eran cunzunt chanzuns englaisas. Il 2015 è el sa participà a l'emissiun «Hello Again» da SRF. Cun sias interpretaziuns da «Tage wie diese» da Die toten Hosen e «Ohne dich schlaf ich heut Nacht nicht ein» da Münchener Freiheit ha el pudì gudagnar la show. Quai success ha carmalà l'attenziun da differentas fatschentas da plattas, quai ch'è stà il punct da partenza per sia carriera commerziala. Plinavant ha el chattà il plaschair da chantar en sia lingua materna: il tudestg. Dus onns pli tard era ses album da debut «Rückenwind» en ils regals da las butias e Vincent Gross sin turnea tranter auter era cun stars sco Luca Hänni e Maite Kelly.

Moin moin...

... conta Vincent Gross a l'entschatta da «Nordlichter», l'emprima chanzun da «Möwengold». In'allusiun a sia segunda patria en Germania dal nord. Il giuven ch'è naschì e creschì si a Basilea chanta en quella chanzun che la patria è là nua che ses cor è.

Sper «Nordlichter» chattan ins anc 13 autras chanzuns sin l'album «Möwengold». Sper balladas sco «Phantomschmerz» ni «Teddybär» chattan ins cunzunt chanzuns cun schlantsch che portan vi bain la buna luna e l'energia positiva che Vincent Gross derasa.

Quest atun san ins sez sa persvader da ses talent durant sia turnea. Là vegn sia Ingeborg senza dubi era puspè ad esser da la partida.

Surpraisa spontana

A Vincent Gross è vegnì ad ureglia ch'in da ses fans lavura en chasa RTR. Perquai ha el spontan fatg ina visita al plaz da lavur da nossa emprendista Vanessa per far ina surpraisa.

Legende: Video Vincent Gross chanta per Vanessa abspielen. Laufzeit 02:07 Minuten.
Or da RTR Social dals 27.08.2018.

Live tar RTR