Las Top 5 chanzuns rumantschas
Curdin Nicolay – «Lai da Staz»
«Lai da Staz» da Curdin Nicolay è la chanzun rumantscha ch’è ida quest onn il pli savens tar RTR. Il chantautur engiadinais ha publitgà questa chanzun l’onn passà suenter ina pausa musicala da tschintg onns. Ils texts da Curdin Nicolay sa basan sin experientschas ed istorgias da sia vita dal mintgadi. «Lai da Staz» è in’istorgia, nua ch’el raquinta dal mintgadi cun ses dus figls. Entant ch’el haja pli baud zuppentà intginas chaussas, chantia el oz pli persunal e pli avert. Entschet ha tut cun ses aug Paulin Nuotclà. Quel aveva regalà ad el ina pitschna ghitarra cun la quala el ha cumenzà a sunar. Ma el na saveva betg leger uschè bain las notas. Per schliar quest problem ha el cumponì sias atgnas chanzuns. Cun la chanzun «Nüglia da nouv» ha el preschentà il 13avel Top Pop Rumantsch.
ANIKK – «Tgi eis ti?»
Sin il segund plaz è ANIKK cun la chanzun «Tgi eis ti?». Cun quella ha l’artista da Sagogn pudì preschentar quest onn il 50avel Top Pop Rumantsch. Esser sincera ed autentica è il pli impurtant per la musicista. Las chanzuns scriva ella sezza e ses cuntegns èn fitg intims e persunals. Melanconia maschadada cun elements ch’animeschan è stà il motto per questa chanzun. Cumenzà sia carriera musicala ha ella cun sunar battaria. Uschia è ella ditg stada plitost davostiers sin tribuna. Cun il temp è il gust dad era star davanttiers e chantar creschì, uschia ch’ella ha cumenzà ad emprender in pèr accords sin la ghitarra da la sora per accumpagnar sasezza. Ditg n’haja ella simplamain betg gughegià da chantar persula sco ella ha tradì en in’intervista cun RTR. Perquai ha ella a l’entschatta fatg musica ensemen cun sia collega Larissa Cathomen. Pass per pass enfin ch’ella ha pudì cumenzar sia carriera da solo.
Bibi Vaplan – «Crazy Popcorn 2»
Sin plaz trais è la chanzun «Crazy Popcorn 2» ch'è part dad in grond project da l’artista engiadinaisa Bibi Vaplan. La «Popcorn-Opera» è in project cultural multi disciplinar che raquinta istorgias davart la furmaziun e la scuverta da l’univers da popcorn. Quai n’ha pia betg da far insatge cun las operas classicas e duess cunzunt svegliar marveglias. Cun creaziuns senza fin, da musica, litteratura, invenziuns e mini-festivals less ella simbolisar ils grauns che schloppan ad in schluppar, en tuttas direcziuns. L’emprim «plopp» è stada la chanzun «Crazy Popcorn 1» ed il segund «Extra life! Roccobello e Leon» – quai èn dus taurs ch’èn medemamain part dal project lantschà il 2020. Cun quai project rimna Bibi Vaplan tranter auter era daners per prolungar la vita da quels dus.
Gianni Tschenett & Oak Street – «Tschêl blov»
Gia sco buob da set onns ha Gianni Tschenett cumenzà a far musica. Questa passiun n’ha fin uss, in decenni e mez pli tard, anc betg bandunà el. Il giuven da Schlarigna ha fin oz sunà en diversas bands. Tranter auter er en la band Airo che aveva cuntanschì il final al bandXost 2018. In onn pli tard ha el gudagnà ina registraziun per il Top Pop Rumantsch da RTR. Il resultat è stà la chanzun «Tschêl blov», l’emprima chanzun rumantscha dal giuven Schlarignot cun sia nova band «Oak Street». Ella tracta da l’encreschadetgna ch’el ha sentì durant ses temp a Turitg. Cun questa chanzun sa tschenta el sin il plaz 4 da las chanzuns emessas il pli savens il 2023 tar RTR.
Ed jau guard ord fanestra, Turitg è puspè tut grisch. Jau turnass gugent a chasa, battess tut en ina valisch. A me manca il tschiel blau ed il sulegl, las muntognas ed atgnamain l’entira val
A Turitg ha el cumenzà il studi da musica e ghitarra da pop a la Scol’auta turitgaisa dals art. Parallel lavura el cun sia nova band vid l'emprim album.
Giganto – «24/7»
Giganto alias Ivo Orlik è ina fatscha e vusch enconuschenta. El ha accumpagnà dal 2015 audituras ed auditurs tras il program dal Radio Rumantsch. Enfin il 2020 è el era stà davant la camera per il Minisguard. Suenter ha el bandunà la chasa RTR. Restada è dentant sia passiun per la musica, surtut per il rap. Ses album da debut «G-punct» è vegnì publitgà il december 2013. Trais onns pli tard ha el producì ensemen cun Mattiu Defuns l’album «Undas». «Sault d’amur» è vegnì publitgà avant quatter onns. L'avust da quest onn ha el lura preschentà duas ulteriuras EP’s. L’emprima sa numna «l’alva» e la segunda la «nera», ensemen «l’alva nera». En in’intervista cun RTR ha el ditg ch’i saja ì per el memia ditg enfin ch’el haja finalmain pudì publitgar l’album nov. In product da quest album è era la chanzun «24/7» ch'è sin il 5avel plaz da las chanzuns idas il pli savens tar RTR.
Las Top 5 chanzuns svizras
Veronica Fusaro – «Weekend»
La chanzun «Weekend» da la chantadura da Thun Veronica Fusaro è part da ses album da debut «All the Colors of the Sky». Cumenzà ha sia carriera musicala cun l’emprima EP «Lost in Thought» il 2016. Cun quella ha la chantadura gia gudagnà il «Demo of the Year» award al M4Music-Festival a Turitg. Plinavant è ella stada il «SRF 3 Best talent» dal matg 2016. Ultra da quai ha Veronica Fusaro dastgà sa preschentar durant ils Swiss Music Awards 2018. La segunda EP è suandada dus onns pli tard e sa numna «ICE COLD». La EP «Sunkissed» è vegnida publitgada in onn pli tard. Il success da la giuvna chantadura mussa era la chanzun «Weekend» ch’è ida il 2023 il pli savens sur l’emettur da RTR.
Joya Marleen – «Next to you»
Joya Marleen sa tschenta sin plaz dus cun la chanzun «Next to you». Ella è vegnida publitgada il zercladur 2022. La newcomra ha 20 onns ed ha gia gudagnà l’onn passà trais Swiss Music Awards. Ina giada sco «Best Female Act», en la categoria «SRF 3 Best talent» e sco «Best Hit» cun la chanzun «Nightmare». Ella ha gia dastgà sa preschentar a differents Open Airs sco per exempel al Gurten Festival a Berna ni quest onn a l'Open Air Lumnezia. L’onn proxim va Joya Marleen sin turnea en Svizra, Germania, Austria ed a Budapest en l’Ungaria.
Joya Marleen – «Terrible Things»
Ed era sin plaz trais è la chantadura giuvna da Son Gagl. Questa giada cun la chanzun «Terrible Things» da l’album da debut «Fish In Your Glas». Ella ha publitgà questa single la fin d’avrigl 2023. Da questa chanzun vegn era il num da l’album. Ella chanta numnadamain: «I'll be the fish in your glass, the only thing that saves me is the fact I'll forget». En in’intervista da RTR cun Elias Tsoutsaios a l’Open Air Lumnezia ha ella ditg ch’ella mettia avant quest pesch en il vaider che haja desideris e siemia d’insatge grond.
Hecht – «Gheie»
La chanzun «Gheie» da la band Hecht da Lucerna è da l’album «Hecht for Life» ch’els han publitgà l’onn 2022. Quest album è sa plazzà sin l’emprim plaz en la parada da hits svizra. Hecht èn gia stads «SRF 3 Best Talent» da l'onn 2013. Ils tschintg umens èn creschids si en il medem vitg e fan gia dapi l’onn 2000 ensemen musica. Els hajan gia adina gì la visiun da vegnir rockstars, sco Stefan Buck ha tradì en in’intervista cun la Schweizer Illustrierte. Ils ultims onns ha Hecht definitivamain chattà in plaz fix en la scena da musica svizra ed era tar RTR. La chanzun «Gheie» è ida durant l'ultim onn il quart pli savens tar RTR.
Pegasus – «Nothing Holding Me Down»
Plaz tschintg da las chanzuns idas il pli savens tar RTR è «Nothing Holding Me Down» da la band Pegasus. Questa chanzun è da l’album «Future:Memories» ch’è vegnì publitgà l’onn 2022. Quest onn han els publitgà ina versiun surlavurada da questa chanzun ed han annunzià ch’i dettia anc plirs da lur hits che vegnian interpretads danovamain cun agid da producents e DJs renumads. «Pegasus Reimagined» ha quest project num.
Las top 5 chanzuns internaziunalas
Leony – «Somewhere in Between»
La single da la chantadura tudestga Leony è la chanzun internaziunala da l’onn sin noss emettur. Leony n’è betg pli ina newcomera è dentant anc adina vid bajegiar si sia carriera sco chantadura da pop. La giuvna da 26 onns è sa participada il 2014 a la casting show tudestga «Rising Star» cun la band «Unknown Passenger» ed ha era gudagnà quella. Be trais mais pli tard ha la band dentant annunzià la separaziun. Leony ha sinaquai persequità la via sco solista. Dapi l’onn 2016 viagescha ella d’ina gronda citad a l’autra sco p.ex. Stockholm, Londra ni Los Angeles per registrar sia musica. Aifer in onn e mez ha ella scrit 130 chanzuns. Ord insaquantas hai dà singles sco per exempel 2017 «Surrender», 2019 «More Than Friends», «Remedy» l’onn 2022 e ses hit da quest onn «Somwhere in Between» ch’è noss top hit internaziunal.
Lewis Capaldi – «Pointless»
Lewis Capaldi n’è betg pli in artist nunconuschent. Questa stad avess el gì in concert a l’Open Air Son Gagl – quel ha el dentant stuì dar giu a curta vista. Quai pervia da ses sindrom da Tourette ed ils problems psichics che resultan da quel. Sin quella novitad ha SRF 3 reagì ed inizià in’acziun a l’Open Air Son Gagl. Numnadamain sche Capaldi na sappia betg chantar per il public, lura chantia il public per el. Ditg e fatg: L’Open Air Son Gagl ha chantà ses pli grond hit «Someone You Loved». Tar RTR parta sia single «Pointless» il segund plaz cun Miley Cyrus.
Miley Cyrus – «Flowers»
«Flowers» da la chantadura americana Miley Cyrus è stada era tar nus in hit ed è ida il segund pli savens tar RTR. Miley Cyrus è ina da las chantaduras da pop dal mument. Sias chanzuns sco per exempel «Malibu» ubain «Midnight Sky» han gì grond success. Dapi l’album «Bangerz» cun la chanzun «Wrecking Ball» da l’onn 2013 na pon ins betg pli imaginar la scena da pop senza ella.
Lost Frequencies & Elley Duhé & X Ambassadors – «Back to You»
Sin plaz quatter è la chanzun ch’è stada ina collavuraziun dal DJ e producent beltg Lost Frequencies, da la chantadura americana Elley Duhé e da la band da rock americana X Ambassadors. L’onn 2014 è la chanzun «Are You With Me» da Lost Frequencies ida si e giu. Dapi lura è il Beltg part da la scena internaziunala da musica da house e dance.
Ava Max – «Million Dollar Baby»
Ava Max è ina giuvna chantadura americana ch’è vegnida renumada l’onn 2018 cun ses toc «Sweet but Psycho». Ava è naschida en ina famiglia musicala. Sia mamma è chantadura d’opera e ses bab è in pianist passiunà. Il dun per la musica è pia mess ad ella en tgina. Mo che la giuvna americana cun ragischs albanaisas daventia gist uschè in «superstar» n'avessan ella e sia famiglia betg pudì s’imaginar. La vusch unica e la musica da pop d’Ava Max lascha spetgar e sa legrar sin dapli ed ha manà ella sin il plaz tschintg en nossa rangaziun.