Ils 24 d’avrigl è l’EP «Malua» cumparida. Be in onn e sis emnas suenter ses album da debut cumpara cun sia EP il proxim chapitel da la musicista da Maiavilla che sa numna uss Gigi Malua. L’onn 2022 ha ella per l’emprima giada fatg part da l’inscunter da la scena da rap svizra tar il Cypher da SRF Virus.
Entaifer quels quatter onns ha ella fatg ina transfurmaziun musicala. Gia cun ses album da debut «Hinterem Mond» il 2025 ha ella fatg il pass tar in rap pli melodius cun dapli parts da chant e tematicas pli profundas. Cun «Malua» cuntinuescha quest viadi. Il meglier exempel per quai è gist l’emprima chanzun da l’EP «Fall». Quella cumenza be cun in clavazin ch’accumpogna il chant da Gigi Malua ed a la fin da la chanzun datti lura ina finiziun pompusa – bunamain sco en ina rock-opera. Che sias ragischs giaschan atgnamain en il rap è d’udir en las chanzuns «High» e «Scarface». Las ultimas duas chanzuns «Teddy» (featuring cun elin) e «Melatonin» èn lura ina maschaida da parts acusticas, electronicas, da rap e chant.
Betg be ina muntada
Gigi Malua è da l’opiniun che chaussas hajan darar be ina vardad. Perquai è l’element central da «Malua» l’ambiguitad. Ils texts laschan spazi per interpretaziun tut tenor punct da vista. Ils temas da las chanzuns sa movan tranter intimitad e fugia, tranter charezza e consum, tranter chaussas ch’ins romantisescha ed autras ch’ins tabuisescha.
Jau na less betg declerar bler davart las chanzuns. Per mai èsi impurtant da laschar spazi per quai ch’ins auda e senta cun tadlar las chanzuns.
L’EP mussa bain il svilup da Gigi Malua durant ils ultims onns. Sia tenuta averta ed inclusiva gioga er ina rolla durant il batten da sia EP ils 29 da matg. Il concert en la Kanzlei a Turitg è organisà en collavuraziun cun l’organisaziun d’agid «147».
