Siglir tar il cuntegn

Header

RTR berichtet live vom Eidg. Volksmusikfest in Belllinzona.
Legenda: RTR
cuntegn

Musica populara La chapitala da la musica populara

Dals 21 fin ils 24 da settember ha lieu a Bellinzona la Festa federala da la musica populara. RTR è per Vus da la partida e porta suns e tuns tar Vus a chasa.

Mintga quatter onns sa scuntra la famiglia da la musica populara per la Festa federala da la musica populara, quest onn per la 14avla giada. Igl è in dals muments ils pli impurtants da la scena musicala populara. Quest onn è quel per l’emprima giada en sia istorgia en il chantun Tessin, a Bellinzona. La chapitala dal Tessin beneventa aderentas ed aderents da la musica populara e daventa per intgins dis la chapitala da la musica populara svizra.

audio
Tuns da la Festa federala da la musica populara a Bellinzona
ord Actualitad dals 26.09.2023. Maletg: SRF
laschar ir. Durada: 5 minutas 14 Secundas.

Premissas idealas

La citad veglia da Bellinzona è quasi optimala per ina tala festa. Sin sis piazzas datti tendas grondas e vitiers datti sin las vias tranter las piazzas anc set tribunas pitschnas per las furmaziuns nua ch'ellas pon dar concerts spontans durant tut ils dis da festa. Dapertut en la citad èn er da vesair mandolinas e ghitarras melnas surdimensionalas ord stiropor che fan endament ch'i dat insatge spezial a Bellinzona.

Durant la festa federala da la musica populara datti durant ils dis da festa en total 400 concerts da 230 furmaziuns. E sche l'aura na fa betg in stritg tras il quint spetga l'organisaziun tranter 60'000 e 100'000 visitadras e visitaders.

Quai spetga Vus a la Festa federala da la musica populara

Avrir la box Serrar la box

Tut ils dis datti musica e concerts sin diversas tribunas en la citad.

GIEVGIA, ILS 21-09-2023

  • 19:00 ceremonia d'avertura Piazza del Sole
  • 20:15 – 22:45 Pavillon suisse (emissiun naziunala)

VENDERDI, ILS 22-09-2023

  • 20:00 Zoogä-n-am Booga sin SRF Musikwelle

SONDA, ILS 23-09-2023

  • 09:00 – 21:00 preschentaziuns avant giurias en diversas salas da la citad
  • 11:00 – 12:30 Kiosque à Musique (RTS)
  • 18:15 Bella musica (emissiun naziunala en tuttas quatter linguas naziunalas

DUMENGIA, ILS 24-09-2023

  • 10:00 – 12:25 La domenica poplare (RSI)
  • 14:00 cortegi da festa (live sin SRF)
  • 14:00 - 16:00 Artg musical (sin RTR)

La gievgia saira è la festa vegnida lantschada cun divers concerts en las tendas da festa. Sin la Piazza del Sole hai dà in'emissiun da radio. In «Pavillon Suisse», vul dir in'emissiun naziunala moderada en las quatter linguas naziunalas. Questa emissiun han Rete Due, RTS Espace deux e SRF2 Kultur emess direct sin lur undas.

RTR ha fatg videos da quest concert nua che quatter furmaziuns ord las quatter regiuns linguisticas èn sa preschentadas. Da la Svizra tudestga è quai stà ils Rusch-Büeblä dal chantun Sviz, da la Svizra franzosa «La-Fa-Mi-Tille», da la Svizra taliana «Marco Zappa e band» e dal Grischun la furmaziun «Prättigauer Power». Quai èn 4 giuvens da 13 onns, ils frars Lukas e Philipp Joos, Laurin Aebli ed Andri Jost.

Era ils proxims dis datti massada concerts. Dals concerts en la tenda da la Piazza del Sole fa RTR videos ch'èn lu da vesair sin Play RTR e pli tard er sin il chanal da youtube da RTR. Tranter auter datti concerts da la «Familienkapelle Forrer», «Echo vom Tannenberg» e la dumengia saira sco punct final «Carlo Brunners Superländlerkapelle cun Lisa Stoll (corn d'alp) e Pepe Lienhard. Era sin la tribuna da la Piazza del Sole datti diveras emissiuns directas e registradas (guarda qua sut).

RTR sco era las autras unitads d'interpresa da la SRG SSR èn partenarias da medias da la festa e rapportan da tut quai che capita al lieu. La chasa da medias rumantscha RTR procura per tut las registraziuns visualas (videos) da diversas emissiuns durant la festa. Er en il radio RTR vegni a dar diversas emissiuns (p.ex. «Artg musical» u «La populara»).

Avais Vus gust sin dapli registraziuns da musica?

Avrir la box Serrar la box
PlayFestas  – vossa musica
Legenda: PlayFestas – vossa musica RTR

En l'archiv da RTR sa chattan passà 11'000 registraziuns musicalas. Pass per pass publitgain nus questas sin nossa plattafurma musicala «PlayFestas».

Dai in sguard qua.

Artitgels legids il pli savens

Scrollar a sanestra Scrollar a dretga