L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
Plirs onns ha Nadine Carina pendulà tranter la Svizra e l'Engalterra. Ella ha numnadamain frequentà la scola da musica «Institute of Performing Arts» a Liverpool. Là ha ella publitgà sias emprimas EPs ed experimentà cun musica electronica. Dapi lura ha ella concertà en l'Engalterra ed en Svizra e publitgà pliras cds, plattas e schizunt in'entir project sin cassettas.
Suenter ina pausa da quatter onns ha ella publitgà il november passà ses novischem album «Reverie». Cun quest album ha ella bandunà in pau la musica electronica ed è sa deditgada a la musica acustica en in stil da chantautura. Per il favrer preschenta la Tessinaisa da 33 onns uss la single «December» giud l'album actual.
RTR MX3 venderdi e sonda a las 19:00