Cun «Valentina» è Pascal Gamboni il terz rumantsch che survegn la schanza da preschentar ina chanzun en tut las regiuns da la Svizra. L’acziun «Mx3 – tuts per in» vegn purtada communablamain dals radios SRF3, Rete Tre, Couleur3 e RTR. Mintga mais vegn selecziunada ina chanzun ch’è silsuenter d’udir mintga di sin mintgin da quests radios.
Everybody Wants the Honey
Suenter che Pascal Gamboni ha preschentà tar nus l'october ses nov album «Everybody Wants the Honey» survegn el uss pia la pussaivladad da sa preschentar cun la «Valentina» al public svizzer.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.