Pascal Gamboni resta fidaivel a sasez, ma preschenta sin ses album nov «Mia barca» tuttina puspè ina nova fassetta. En ses ultims albums «Caos el paradis» ed en «Alpine Lo-Fi Folk» ha el lavurà bler cun samples ed effects. Quellas spezialitads èn era da chattar sin la platta actuala – dentant pli pauc e decent.
«Mia barca» è puspè pli fin, acustic, reducì e forsa era in zic pli intim. En 13 chanzuns elavura el temas persunals e temas dal mintgadi. Quai perquai ch’ils ultims dus onns n’eran betg ils pli simpels en la vita dal Tuatschin. Cun chanzuns saja quai pli simpel da discurrer da sentiments che en conversaziuns, di Pascal Gamboni, e dechanta quai era en sia chanzun «Mo aun in gol».
En «Ina nibla el tschiel» scriva el da pitschnas chaussas che fan pli bel il mintgadi – dal sulegl che traglischa en il flum, ch’ils pes han plaschair da chalzers novs ubain da durmir ditg. Da giudair il mument ed esser sveglià raquinta «O el clar».
Cun quels differents temas, stils da musica ed elements han ins en l’album «Mia barca» il sentiment da sfegliar tras il cudeschet da notizias da Pascal Gamboni ch’el ha adina cun sai per far skizzas e notar patratgs ed observaziuns.
