16 onns aveva Jack Savoretti cura ch’el ha decis «quai vul er jau far». Cun «quai» sa refereschia el sin il concert da Bob Dylan ch’el ha vis ensemen cun sia marusa da scola dal 1999 en il Hallenstadion a Turitg.
«Quai Bob Dylan è er be in uman» saja stat sia regurdanza dal concert da ses idol. Ditg e fatg: 22 onns pli tard è Jack Savoretti in musicist cun success. Stadions plains, trais albums d’or ed in album sin plazza in dals charts britannics. E sin l’ultim album cun il titel «Singing to Strangers» ha Jack Savoretti perfin pudì partir dretgs d’autur d’ina chanzun cun ses idol Bob Dylan.
In album per la stad
Ussa preschenta il musicist, ch’e creschì si a Lugano ed en l'Engalterra, ses settavel album cun il titel «Europiana». In album che duai tunar «sco avrir ina buttiglia schampagner». Stads plain glischur, romanzas e plaschair ed il gust da rosé ed il mediterran sin la lieunga: ils chavazzins empermettan in album per il temp chaud.
Jau sun ina persuna fitg europeica
Il titel «Europiana» stà d’ina vart per l’identitad europeica ch’er el persunifitgescha cun sias ragischs talianas, polacas e tudestgas. Il pled saja dentant in mix dals pleds Americana ed Europa – uschia descriva Jack Savoretti numnadamain ses stil da musica. La musica da l’Europa haja adina puspè laschà inspirar da melodias e ritmica da l’America ed uschia era el. Quai saja er in motiv che musicists enconuschents sco Nile Rodgers u John Oat sajan part da tschertas chanzuns.
Ina chaussa da famiglia
Europiana saja sut la fatscha da melodias da stad dentant er in’ovra che tematisescha famiglia. Na be ses uffants e sia dunna hajan chantà tschertas passaschas, er ils texts sajan influenzads da relaziuns e dal schazegiar quai ch’ins ha. Surtut en il lockdown hajan quels temas dat da pensar puspè a Jack Savoretti.
Indesch chanzuns han lieu sin il settavel album da Jack Savoretti che porta il titel «Europiana» e cumpara ils 25 da zercladur. In portatun che na dess betg be purtar tuns ma era il sulegl e la stad. In’ovra che tuna pli superfiziala en la musica che quai ch’ella è en il text.