Nov album da Martina Linn - «Las pli bellas istorgias scriva la vita»

Il giavisch da registrar in album a Nashville ha Martina Linn gia gì avant in pèr onns. Pervia da la pandemia n'era quai lura betg pussaivel. Perquai aveva ella nizzegià quel temp per scriver chanzuns e poesias rumantschas. Uschia è ella era vegnida en contact cun l'autur e musicist Tim Krohn.

Ensemen cun el ha ella lura scrit novas chanzuns. Ella ha raquintà sias istorgias ed el ha or da quai scrit liricas per las melodias da Martina Linn. Il process da realisar questas novas chanzuns era per ella ina sort terapia.

Fin a quel punct n'era il plan betg da registrar quellas chanzuns a Nashville. Martina Linn aveva però publitgà singulas parts da las novas chanzuns sin instagram e tras quai è il producent american Dean Miller daventà attent sin l'Engiadinaisa.

Dean Miller

Avrir la box Serrar la box

Roger Dean Miller Jr. è in chantadur da country US-American, songwriter e producent da musica. El è il figl dal star da country Roger Miller ed ha gia lavurà cun gronds stars sco per exempel Dolly Parton u Chris Stapleton.

Uschia aveva el scrit in messadi cun la dumonda sch'ella na vul betg registrar en ses studio a Nashville las chanzuns. Ina schanza unica che Martina Linn ha prendì.

L'album è lura vegnì realisà en ils «sound emporium studios». In studio nua che blers auters stars oravant tut dal country han gia fatg musica, tranter auter Ringo Starr. Per Martina Linn era quest'aventura in viadi plain magia ch'ella aveva gia resentì cun arrivar a Nashville.

Martina Linn en il studio a Nashville