In concept-album ubain ina concept-EP è ina rimnada da chanzuns che raquintan in’istorgia. Las chanzuns n’èn betg isoladas, mabain stattan en relaziun ina cun l’autra e portant uschia enavant l'istorgia.
«Solar Storm» raquinta l’istorgia d’ina burasca da sulegl (Sonnensturm) smanatschanta. Ina catastrofa naturala che pudess destruir entiras infrastructuras e l’entira electronica sin il mund. Tscherts interpreteschan questa catastrofa sco insatge divin – uschia era la protagonista da la EP da concept: Ina giuvna ch'ha difficultads da chattar ses plaz en la societad. Entras la catastrofa chatta ella tuttenina insatge che dat senn a sia vita, che calma e che dat in sentiment d’esser part dad insatge. Cura che la catastrofa è passada perda la protagonista puspè ses senn da vita temporar e sa chatta danovamain en la situaziun d’entschatta cun ils medems problems. Tant da l’istorgia che vegn raquintada cun las sis chanzuns.
In narrativ mess en musica
L’EP cumenza cun «Rewire» – l’uschenumnà mument incitond (inciting incident). Vinavant cun «Turns out we’re not doing so well» (Sco i sa mussa na vai betg uschè bain cun nus) che vegn chantà dad Olivia Virgolin maina tar la conclusiun «Time to rewire» (temp per sa midar). Quella cuntanscha tar «The Climb» la culminaziun che vegn descritta en il text per exempel cun «The storm will drown this place so we can grow» (La burasca vegn a najentar quest lieu uschia che nus possian crescher). Lura capita en «Solar Storm» la catastrofa – mess enturn be instrumental cun diversas parts che simboliseschan las fasas da la catastrofa. Las ultimas duas chanzuns «Copy Pasted» e «Still Here» concludan l’EP.
Musicalmain mainan divers elements atras la istorgia. Ina giada pli plaun, pli siemius, lura pli dir, spert ed electronic – uschia che las melodias creeschan las emoziuns ed atmosferas ch'i dovra en las scenas.
Facit
Sis chanzuns ch’ins sto atgnamain tadlar da l’entschatta fin a la fin per chapir. Ed era lura èsi in agid d’enconuscher l’istorgia. Igl è curaschus da publitgar ina EP da concept en in business da musica che viva da single tar single. Ins senta ch’il duo Happy For Real sa senta pli segir, curaschus e liber cun scriver chanzuns. Els na vulan betg ir cun il trend – dentant, sco els din sez, n’era betg ir activ encunter quel. Ditg curt: Els han creà musica in zic pli cumplitgada e betg per in e scadin.
